កិច្ចប្រជុំរាយការណ៍ស្ដីពី “ការអនុវត្តសកម្មភាពឆ្នាំ២០២៥ និងទិសដៅបន្ត” របស់ក្រុមការងារមនុស្សចាស់ អន្តរជំនាន់ និងពហុមុខងារ និងក្រុមការងារសកម្មភាពជនពិការ ទីស្ដីការក្រសួង៖ នាថ្ងៃអង្គារ ទី៣០ ខែធ្នូ ឆ្នាំ២០២៥ ឯកឧត្ដម សួន រចនា រដ្ឋលេខាធិការ និងជាប្រធានក្រុមការងារមនុស្សចាស់ អន្តរជំនាន់ និងពហុមុខងាររបស់ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំរាយការណ៍ស្តីពី "ការអនុវត្តសកម្មភាពឆ្នាំ២០២៥ និងទិសដៅបន្ត” នៃក្រុមការងារមនុស្សចាស់ អន្តរជំនាន់ និងពហុមុខងារ និងក្រុមការងារសកម្មភាពជនពិការរបស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្ដមអនុរដ្ឋលេខាធិការ ឯកឧត្តមទីប្រឹក្សា លោកអគ្គនាយករង លោកតំណាងមកពីក្រសួងសង្គមកិច្ច អតីតយុទ្ធជន និងយុវនីតិសម្បទា លោក-លោកស្រីប្រធាន-អនុប្រធាននាយកដ្ឋាន លោក-លោកស្រីប្រធាន-អនុប្រធានការិយាល័យ មន្រ្តីជំនាញ និងមន្រ្តីស្ម័គ្រចិត្ត សរុបចំនួន ២៩រូប។ កិច្ចប្រជុំនេះរៀបចំឡើងដើម្បីពិនិត្យលើសេចក្តីរាយការណ៍ពីការអនុវត្តផែនការសកម្មភាពមួយចំនួន ដែលបានកំណត់ដោយគោលនយោបាយជាតិស្តីពីមនុស្សវ័យចាស់ ឆ្នាំ២០១៧-២០៣០ និងផែនការយុទ្ធសាស្រ្ត ស្តីពីពិការភាព ឆ្នាំ២០២៤-២០២៨ ជាមួយនឹងការចែករំលែកចំណេះដឹង បទពិសោធន៍ និងការប្រឹក្សាណែនាំផ្សេងៗរបស់មន្រ្តីបង្គោល ក្នុងទិសដៅរៀបចំផែនការសកម្មភាពនៅក្នុងវិស័យសាធារណការ និងដឹកជញ្ជូន ឱ្យមានសូចនាករច្បាស់លាស់នៅក្នុងផែនការឆ្នាំ។ ឯកឧត្តមប្រធានក្រុមការងារ បានណែនាំឱ្យមន្រ្តីជំនាញត្រូវធ្វើការយកចិត្តទុកដាក់ និងអនុវត្តតាមការណែនាំ ការផ្តល់គំនិតយោបល់ពីថ្នាក់ដឹកនាំ គ្រូបង្គោល និងដៃគូរសហការ ដើម្បីរៀបចំផែនការសកម្មភាពទៅតាមឆ្នាំបន្តបន្ទាប់ឱ្យមានលក្ខណៈគ្រប់ជ្រុងជ្រោយ ដូចជាការរៀបចំបំពាក់បរិក្ខារ និងផ្លាកសញ្ញាប្រើប្រាស់សម្រាប់មនុស្សចាស់ ជនពិការ ស្ត្រីមានផ្ទៃពោះ និងកុមារនៅតាមយានជំនិះ នៅតាមដងផ្លូវធ្វើដំណើរ និងនៅតាមទីធ្លាលំហសាធារណៈ ក្នុងការពង្រឹងសុខុមាលភាពសង្គមនៅក្នុងវិស័យដឹកជញ្ជូន និងហេដ្ឋារចនាសម្ព័ន្ធរូបវន្ត តាមរយៈការប្រជុំក្រុមការងារ ការវាយតម្លៃលទ្ធផល និងការកែលម្អគុណភាពសេវាឱ្យកាន់តែប្រសើរឡើង ស្របតាមទិសដៅរបស់ថ្នាក់ដឹកនាំ៕