សិក្ខាសាលាពិគ្រោះយោបល់ ស្តីពីគោលការណ៍ណែនាំរួមសម្រាប់ការធ្វើអធិការកិច្ច នៃក្រសួងសាធារណការ និងដឹកជញ្ជូន កំពត៖ នាថ្ងៃអង្គារ-ពុធ ទី៩-១០ ខែធ្នូ ឆ្នាំ២០២៥ ឯកឧត្តម មួន វាសនា រដ្ឋលេខាធិការ ក្រសួងសាធារណការ និងដឹកជញ្ជូន និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញអធិបតីក្នុងសិក្ខាសាលាពិគ្រោះយោបល់ ស្តីពីគោលការណ៍ណែនាំរួមសម្រាប់ការធ្វើអធិការកិច្ច នៃក្រសួងសាធារណការ និងដឹកជញ្ជូន ដោយមានការអញ្ជើញ ចូលរួមពីសំណាក់ ឯកឧត្តម លោកជំទាវជាថ្នាក់ដឹកនាំ នៃអគ្គនាយកដ្ឋានជំនាញក្រោមឱវាទក្រសួង មន្ទីរសាធារណការ និងដឹកជញ្ជូនរាជធានី-ខេត្តទាំង២៥ សហគ្រាសសាធារណៈ កងវិស្វកម្ម និងស្ថាប័នឯកជនជាដៃគូពាក់ព័ន្ធ សរុបប្រមាណ២២០នាក់។ សិក្ខាសាលានេះ ត្រូវបានរៀបចំឡើងជាលើកទីពីរ ក្នុងគោលបំណងប្រមែប្រមូលធាតុចូលបំពេញបន្ថែមទៀត និងឈានទៅបញ្ចប់ការរៀបចំសេចក្តីព្រាងគោលការណ៍ណែនាំរួមស្តីពីការធ្វើអធិការកិច្ច នៃក្រសួងសាធារណការ និងដឹកជញ្ជូន។ កិច្ចខិតខំប្រឹងប្រែងនេះដើម្បីឆ្លើយតបទៅនឹងបរិបទថ្មី នៃការអនុវត្តប្រព័ន្ធ និងវិធានត្រួតពិនិត្យផ្ទៃក្នុងរបស់ក្រសួង សំដៅធានាបាននូវនីត្យានុកូលភាព ប្រសិទ្ធភាព ស័ក្តិសិទ្ធភាព តម្លាភាពនិងគណនេយ្យភាព ព្រមទាំងចូលរួមចំណែកអនុវត្តយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ត្រឹមត្រូវ ស្វាហាប់ ប្រកបដោយភាពឈ្លាសវៃ និងប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលកំណត់យកការពង្រឹងអភិបាលកិច្ចល្អ និងការកែទម្រង់ជាស្នូល រួមមានការកែទម្រង់ការគ្រប់គ្រងហិរញ្ញវត្ថុសាធារណៈ និងការកែទម្រង់រដ្ឋបាលសាធារណៈ ជាដើម។ ឯកឧត្តមរដ្ឋលេខាធិការ បានថ្លែងនូវការកោតសរសើរ និងបន្តគាំទ្រយ៉ាងពេញទំហឹងចំពោះអគ្គាធិការដ្ឋាន ក្នុងនាមជាសេនាធិការឱ្យក្រសួង ជាអង្គភាពត្រួតពិនិត្យផ្ទៃក្នុង ដែលកន្លងមកបានខិតខំប្រឹងប្រែងបំពេញតួនាទី ភារកិច្ចរបស់ខ្លួនយ៉ាងខ្ជាប់ខ្ជួន និងល្អប្រសើរ ប្រកបដោយមនសិការវិជ្ជាជីវៈ មានការទទួលខុសត្រូវខ្ពស់ ដែលជាតួអង្គសំខាន់មួយក្នុងការចូលរួមអនុវត្ត (១)កម្មវិធីកំណែទម្រង់រដ្ឋបាលសាធារណៈដោយធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ និង(២)កម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួង ដែលត្រូវបានកំណត់ច្បាស់លាស់នូវចក្ខុវិស័យ គោលបំណង គោលដៅ និងលទ្ធផលការងារឬសមិទ្ធកម្មស្របតាមច្បាប់ និងលិខិតបទដ្ឋានគតិយុត្តជាធរមាន។ សិក្ខាសាលានេះដែរ ត្រូវបានបិទក្រោមអធិបតីភាព ឯកឧត្តម ភួង ភិរុណ អនុរដ្ឋលេខាធិការ ក្រសួងសាធារណការ និងដឹកជញ្ជូន ដោយឯកឧត្តមបានផ្តាំផ្ញើដល់សិក្ខាកាមទាំងអស់ពាំនាំនូវចំណេះដឹងថ្មី បទពិសោធន៍ថ្មី នីតិវិធីថ្មី ដែលទទួលបានក្នុងរយៈពេលពីរថ្ងៃនេះ ទៅបន្តផ្សព្វផ្សាយនៅតាមសាមីអង្គភាពឱ្យបានទូលំទូលាយ ដើម្បីកែលម្អចំណុចខ្វះខាតនាពេលកន្លងមកក្នុងការអនុវត្តតួនាទី ភារកិច្ចរបស់ខ្លួនឱ្យកាន់ល្អប្រសើរឡើង៕