ភ្នំពេញ៖ ផ្លូវជាតិលេខ៤៨ គឺជាខ្សែផ្លូវយុទ្ធសាស្ត្ររបស់រាជរដ្ឋាភិបាល ដើម្បីបង្កើនការតភ្ជាប់សេដ្ឋកិច្ច ពាណិជ្ជកម្ម ដឹកជញ្ជូន ភស្តុភារកម្ម និងទេសចរណ៍ ដែលបាននិងកំពុងដើរតួនាទី ជាសរសៃឈាមសេដ្ឋកិច្ច ដ៏មានសក្តានុពលរបស់កម្ពុជា ។ យោងតាមបណ្តាញសង្គម នាថ្ងៃទី៤ ខែធ្នូ ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ខ្សែផ្លូវជាតិលេខ៤៨ បាននិងកំពុងដើរតួនាទី ជាសរសៃឈាមសេដ្ឋកិច្ច ដ៏មានសក្តានុពលរបស់កម្ពុជា និយាយជារួម ក៏ដូចជាខេត្តកោះកុង និយាយដោយឡែក ក្នុងគោលដៅជួយសម្រួល ដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្ម តភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅ នៅក្រុងព្រះសីហនុ សំដៅរួមចំណែកក្នុងការជំរុញ ការដោះដូរពាណិជ្ជកម្ម វិនិយោគ និងការដឹកជញ្ជូនដំណាំកសិផល និងកសិ-ឧស្សាហកម្ម ឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយកាន់តែតិច។ លើសពីនេះ ផ្លូវជាតិលេខ៤៨ ក៏បានតភ្ជាប់ជាមួយនឹងផ្លូវជាតិលេខ១០ ទៅខេត្តពោធិ៍សាត់ ខេត្តបាត់ដំបង និងខេត្តប៉ៃលិនផងដែរ ដែលជាការតភ្ជាប់បណ្តាញគមនាគមន៍ មកកាន់តំបន់ឆ្នេរ និងកំពង់ផែ សម្រួលការធ្វើដំណើរបាន កាន់លឿនរហ័ស និងមានប្រសិទ្ធភាពខ្ពស់។ គម្រោងលើកកម្រិតគុណភាពផ្លូវជាតិលេខ៤៨ នេះ បានតភ្ជាប់ពី ស្រែអំបិល(ផ្លូវបំបែកផ្លូវជាតិលេខ៤) រហូតដល់ក្រុងខេមរភូមិន្ទ ខេត្តកោះកុង ប្រវែងជាង ១៤៨ គ.ម ដោយបានសម្រេចការងាររួចរាល់ជាស្ថាពរ កាលពីថ្ងៃទី២២ ខែមេសា ឆ្នាំ២០២៥៕