សិក្ខាសាលាផ្សព្វផ្សាយ និងជំរុញការអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ លើកទី៤ ស្ទឹងត្រែង៖ នាថ្ងៃទី១ ខែធ្នូ ឆ្នាំ២០២៥ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីបើកសិក្ខាសិក្ខាសាលាផ្សព្វផ្សាយ និងជំរុញការអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ ដោយមានការអញ្ជើញចូលរួមពីថ្នាក់ដឹកនាំក្រសួង តំណាងអភិបាល នៃគណៈអភិបាលខេត្ត តំណាងមន្ទីរពាក់ព័ន្ធ តំណាងសភាពាណិជ្ជកម្មទាំង ៥ខេត្ត រួមមាន៖ ខេត្តកំពង់ចាម ក្រចេះ ស្ទឹងត្រែង មណ្ឌលគិរី និងខេត្តរតនគិរី ព្រមទាំងមន្ត្រីជំនាញពាក់ព័ន្ធ នៃអគ្គនាយកដ្ឋានភស្តុភារកម្មជាច្រើនរូប។ សិក្ខាសាលានេះ ត្រូវបានរៀបចំឡើងក្នុងគោលបំណង ដើម្បីផ្សព្វផ្សាយផែនការមេ ដល់គ្រប់ភាគីពាក់ព័ន្ធលើគម្រោងដែលមាននៅក្នុងផែនការមេសរុបចំនួន ១៧៤គម្រោង ដោយបែងចែកជា ០២ដំណាក់កាលសម្រាប់ការអនុវត្តរួមមាន៖១). គម្រោងអនុវត្តរយៈពេលខ្លី និងមធ្យម (ចាប់ពីឆ្នាំ២០២៣-២០២៧) ចំនួន៩០គម្រោង និង ២). គម្រោងរយៈពេលវែង (ចាប់ពីឆ្នាំ២០២៨-២០៣៣) ចំនួន ៩១គម្រោង ជាមួយនឹងទុនវិនិយោគលើការអនុវត្តការងារ។ ថ្លែងនាឱកាសនោះ ឯកឧត្តមរដ្ឋលេខាធិការ មានក្ដីសង្ឃឹមយ៉ាងមុតមាំថា តាមរយៈសិក្ខាសាលានេះ សិក្ខាកាម ទាំងអស់ ទទួលបានចំណេះដឹងបន្ថែម និងយល់ដឹងពីសារៈសំខាន់ រួមទាំងគោលដៅ របស់គម្រោងនានាដែលមាននៅក្នុង“ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣” ដែលបានរួមចំណែកយ៉ាងសំខាន់ក្នុងការលើកកម្ពស់កំណើនសេដ្ឋកិច្ចប្រទេសកម្ពុជា ឆ្ពោះទៅកាន់ចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០៕