ភ្នំពេញ៖ ក្រសួងសាធារណការ និងដឹកជញ្ជូន បានប្រកាសថា នឹងបិទចរាចរណ៍រយៈពេលខ្លីៗ នៅចំណុច សង្កាត់ចាក់អង្រែក្រោម រយៈពេល៣ថ្ងៃ ចាប់ពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០២៥ ដើម្បីក្រុមការងារ អនុវត្តការរំកិលធ្នឹមស្ពាន នៃគម្រោង សាងសង់ស្ពាន ឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) កាត់ពីលើផ្លូវជាតិលេខ២ ការពារការកកស្ទះចរាចរណ៍ ។ តាមសេចក្តីជូនដំណឹង របស់ក្រសួងសាធារណការនៅថ្ងៃ២៥ ខែវិច្ឆិកា ឆ្នាំ២០២៥នេះ បានបញ្ជាក់ថា ការបិទចរាចរណ៍រយៈពេលខ្លី ដែលអាចនឹងកកស្ទះ រំខានដល់អ្នកធ្វើចរាចរណ៍ ក្នុងអំឡុងពេល នៃការអនុវត្តរំកិលធ្នឹមស្ពាន ផ្នែកខាងលិច នៅចន្លោះ សសរស្ពានទី៥ កាត់រំលងផ្លូវជាតិលេខ២ (ក្បែរសាលា ACE) នេះ គឺដើម្បី សុវត្ថិភាពអ្នកដំណើរ។ ដូចនេះ ដើម្បីសម្រួល ដល់ការធ្វើដំណើរ និងធានាបាននូវសុវត្ថិភាព អ្នកដំណើរតាមផ្លូវជាតិលេខ២ ឆ្លងកាត់តំបន់ការ ដ្ឋានសាងសង់ ក្រសួងអំពាវនាវដល់សាធារណជន ប្រជាពលរដ្ឋ ប្រតិបត្តិករ និងក្រុមហ៊ុនដឹកជញ្ជូនទាំងអស់ សូមធ្វើដំណើរវាងតាមមហាវិថី សម្តេចតេជោហ៊ុន សែន (ផ្លូវ៦០ម.)វិញ ដើម្បីកាត់បន្ថយការកកស្ទះចរាចរណ៍៕