ក្រុមការងារ ស.ស.យ.ក. វិស័យសាធារណការ និងដឹកជញ្ជូន ចូលរួមយុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក នៅមុនឱកាសនៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ភ្នំពេញ៖ នៅថ្ងៃសុក្រ ទី៣១ ខែតុលា ឆ្នាំ២០២៥ ក្រុមការងារ ស.ស.យ.ក. វិស័យសាធារណការ និងដឹកជញ្ជូន សហការជាមួយ អគ្គលេខាធិការដ្ឋាន នៃគ.ស.ច.គ. បានរៀបចំធ្វើយុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក ដើម្បីជាការពញ្ញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ន មុនឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ក្រោមអធិបតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ.) ដោយមានការចូលរួមពី មន្រ្តីអគ្គលេខាធិការដ្ឋាននៃគ.ស.ច.គ. នាយកដ្ឋានសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនរាជធានីភ្នំពេញ អង្គការមូលនិធិបង្ការរបួសអាស៊ី និងក្រុមហ៊ុនម៉ូតូហុងដា កងកម្លាំងនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ និងកងរាជអាវុធហត្ថរាជធានីភ្នំពេញ ដែលពិធីនេះធ្វើឡើងនៅបណ្តោយផ្លូវជាតិលេខ៥ មុខទីលានប្រជាធិបតេយ្យ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ យុទ្ធនាការនេះ មានការអប់រំផ្សព្វផ្សាយណែនាំដល់អ្នកប្រើប្រាស់យានយន្ត ជាពិសេសអ្នកបើកបរទោចក្រយានយន្តឱ្យយល់ដឹងអំពីច្បាប់ចរាចរណ៍ផ្លូវគោក និងបានចែកជូននូវឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក តាមរយៈការសួរនិងឆ្លើយសំណួរដើម្បីទទួលបានមួកសុវត្ថិភាពជារង្វាន់និងកម្មវិធីមួកចាស់ប្តូរមួកថ្មី។ ជាលទ្ធផលនៅក្នុងយុទ្ធនាការនេះ អគ្គលេខាធិការដ្ឋាន គ.ស.ច.គ បានចែកជូននូវសម្ភារៈមួយចំនួនរួមមានៈ ១). មួកសុវត្ថិភាពចំនួន ៥១មួក ២). សៀវភៅច្បាប់ស្តីពីចរាចរណ៍ផ្លូវគោក ៥០០ក្បាល ៣). ស្ទីកឃ័រចំណាំងផ្លាត ១០០០សន្លឹក ៤). សៀវភៅអ្វីដែលអ្នកបើកបរម៉ូតូត្រូវយល់ដឹង ១៥០០ក្បាល ៥). ខិតបណ្ណជំនួយស្មារតីស្តីពីសុវត្ថិភាពចរាចរណ៍ផ្លូវគោក ១៥០០ ច្បាប់ ៦). ខិតបណ្ណ អនុក្រឹត្យផាកពិន័យ ១៥០០សន្លឹក ៧). ខិតបណ្ណ ស.ស.យ.ក ៥០០សន្លឹក ៨). ស្ទីកឃ័រ សីលធម៌១០ចំណុច ១០០០សន្លឹក៕