ក្រសួងសាធារណការ និងដឹកជញ្ជូន រៀបចំវគ្គផ្សព្វផ្សាយស្តីពីអនុសញ្ញាស្ដីពីការលុបបំបាត់ទម្រង់ នៃការរើសអើងប្រឆាំងនឹងនារីភេទ(CEDAW) និងអនុសាសន៍ទាំង១២ចំណុចរបស់សម្ដេចមហាបវរធិបតី និងច្បាប់ពាក់ព័ន្ធមួយចំនួន ក្រចេះ៖ នាថ្ងៃសុក្រ ទី១៧ ខែតុលា ឆ្នាំ២០២៥ លោកជំទាវ មឹន មាណវី រដ្ឋលេខាធិការ និងជាប្រធានគណកម្មការទទួលបន្ទុកយេនឌ័រ និងយន្តការគាំទ្ររបស់ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងវគ្គផ្សព្វផ្សាយស្តីពីអនុសញ្ញាស្ដីពីការលុបបំបាត់ទម្រង់ នៃការរើសអើងប្រឆាំងនឹងនារីភេទ(CEDAW) និងអនុសាសន៍ទាំង១២ចំណុចរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងច្បាប់ពាក់ព័ន្ធមួយចំនួន ដោយមានការចូលរួមពី ឯកឧត្តម គង់ គឹមនី អភិបាលរង តំណាងឯកឧត្តមអភិបាល នៃគណៈអភិបាលខេត្តក្រចេះ ឯកឧត្តមអនុរដ្ឋលេខាធិការ អគ្គនាយករង អគ្គាធិការរង លោកស្រីប្រធានមន្ទីរកិច្ចការនារីខេត្ត គ្រូឧទ្ទេសជាតំណាងអគ្គលេខាធិការដ្ឋាន នៃក្រុមប្រឹក្សាជាតិកម្ពុជាដើម្បីស្ត្រី អង្គភាពពាក់ព័ន្ធ មន្ត្រី នៃមន្ទីរសាធារណការ និងដឹកជញ្ជូនខេត្តក្រចេះ រតនគិរី មណ្ឌលគិរី ស្វាយរៀង ព្រៃវែង ត្បូងឃ្មុំ និងខេត្តកំពង់ចាម សរុបប្រមាណណ៨០រូប។ វគ្គផ្សព្វផ្សាយនេះត្រូវបានរៀបចំឡើងក្នុងគោលបំណងបង្ហាញឱ្យឃើញថាប្រមុខរាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុហការលើកកម្ពស់តួនាទី និងការចូលរួមរបស់ស្រ្តីនៅគ្រប់ស្ថាប័នរាប់តាំងពីក្រុម ភូមិ ឃុំ សង្កាត់ខណ្ឌ ស្រុក រាជធានីខេត្ត ក្រសួងមន្ទីរ និងក៏បានផ្សារភ្ជាប់ជាមួយអង្គការអន្តរជាតិ ដើម្បីជាការចូលរួមគោរពច្បាប់អន្តរជាតិ និងពង្រឹងកិច្ចសហប្រតិបត្តិការជាសកលដើម្បីសុខសន្តិភាព និងការអភិវឌ្ឍលើគ្រប់វិស័យ និងលើកកម្ពស់ជីវភាព សុខុមាលភាព និងសិទ្ធិពេញលេញរបស់ប្រជាពលរដ្ជនិងស្រ្តី។ ជាមួយគ្នានោះផងដែរ លោកជំទាវរដ្ឋលេខាធិការ បានអំពាវនាវឱ្យបងប្អូនប្រជាពលរដ្ឋទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួនក្នុងស្មារតីទទួលខុសត្រូវខ្ពស់ និងប្រកាន់យកគោលការណ៍សុវត្ថិភាពជាចម្បង ដើម្បីជៀសផុតពីគ្រោះថ្នាក់ចរាចរណ៍ដើម្បីសុវត្ថិភាពទាំងកាយសម្បទា និងរក្សាទ្រព្យសម្បត្តិរដ្ឋ និងឯកជនរួមជាមួយភាពសុខដុមមិនមានការើសអើងចំពោះនារីភេទ ឈានទៅមានការឯកភាជាតិក្នុងការជំរុញកំណើនសេដ្ឋកិច្ច និងសង្គម ឆ្លើយតបចំពោះការខិតខំរបស់កងទ័ព និងថ្នាក់ដឹកនាំកំពូលរបស់កម្ពុជាដែលប្តូរជីវិត លះបង់កម្លាំងកាយប្រាជ្ញាចិត្ត ដើម្បីការពារប្រទេសជាតិ៕