សិក្ខាសាលាស្តីពី “ការផ្សព្វផ្សាយរបាយការណ៍ ស្តីពីការសិក្សាតម្លៃឡូជីស្ទីក ឆ្នាំ២០២៤ និងការស្ទង់មតិថ្មី ឆ្នាំ២០២៥” រាជធានីភ្នំពេញ៖ នាថ្ងៃសុក្រ ទី១០ ខែតុលា ឆ្នាំ២០២៥ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលា ស្តីពី “ការផ្សព្វផ្សាយរបាយការណ៍ ស្តីពីការសិក្សាតម្លៃឡូជីស្ទីក ឆ្នាំ២០២៤ និងការស្ទង់មតិថ្មី ឆ្នាំ២០២៥” ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីរាជការចំណុះអគ្គនាយកដ្ឋានភស្តុភារកម្ម និងក្រុមហ៊ុនឯកជនដែលផ្តល់សេវាកម្ម និងប្រើប្រាស់សេវាឡូជីស្ទីក សរុបប្រមាណ៧០រូប។ សិក្ខាសាលានេះ ត្រូវបានរៀបចំឡើងក្នុងគោលបំណង (១). ផ្សព្វផ្សាយលទ្ធផលនៃការស្ទង់មតិពីការសិក្សាអំពីថ្លៃចំណាយ ពេលវេលា និងភាពជឿទុកចិត្តនៃសេវាភស្តុភារកម្ម ឆ្នាំ២០២៤ (២). ធ្វើការស្ទង់មតិជាមួយក្រុមហ៊ុនឯកជន សម្រាប់ទិន្នន័យឆ្នាំ២0២៥ និង (៣). ស្វែងយល់អំពីបញ្ហាប្រឈម និងកាលានុវត្តភាពនៅក្នុងវិស័យឡូជីស្ទីក។ សូមជម្រាបជូនថា នាយកដ្ឋានអង្កេត និងបូកសរុប នៃអគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន ធ្លាប់បានធ្វើការស្ទង់មតិជាច្រើនលើកមកហើយជាមួយក្រុមហ៊ុនឯកជននានា រួមមាន៖ សមាជិករបស់សមាគមភស្តុភារកម្មកម្ពុជា (CLA), សមាគមដឹកជញ្ជូនទំនិញផ្លូវគោកកម្ពុជា (CAMTA), សភាពាណិជ្ជកម្មអឺរ៉ុបប្រចាំនៅកម្ពុជា (EuroCham) សហព័ន្ធស្រូវអង្ករកម្ពុជា (CRF) និងភាគីពាក់ព័ន្ធមួយចំនួនទៀត។ នៅក្នុងឆ្នាំ២០២៥នេះ នាយកដ្ឋានអង្កេត និងបូកសរុប នៃអគ្គនាយកដ្ឋានភស្តុភារកម្ម គ្រោងនឹងបន្តពង្រីកវិសាលភាពនៃការរៀបចំធ្វើការស្ទង់មតិជាមួយក្រុមហ៊ុនឯកជនបន្តទៀត ក្នុងគោលបំណងសិក្សាឱ្យកាន់តែលម្អិតបន្ថែមលើថ្លៃចំណាយ និងពេលវេលា បញ្ហាប្រឈម និងទទួលយកមតិយោបល់នានា ដើម្បីជាធាតុចូលយ៉ាងសំខាន់ក្នុងការអភិវឌ្ឍវិស័យដឹកជញ្ជូន និងឡូជីស្ទីក នៅប្រទេសកម្ពុជា៕