ពិធីបើកសិក្ខាសាលាផ្សព្វផ្សាយ និងបណ្តុះបណ្តាលស្តីពីគោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន ខេត្តសៀមរាប៖ ថ្ងៃសុក្រ ទី៣ ខែតុលា ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ និងជាអនុប្រធានប្រចាំការ នៃក្រុមការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ, ផែនការអភិវឌ្ឍន៍ និងគោលនយោបាយរបស់ក្រសួងសាធារណការ និងដឹកជញ្ជូន (ហៅកាត់ថា ក.យ.ផ.គ.សកដ) ជាតំណាងដ៏ខ្ពង់ខ្ពស់របស់ លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារ បានអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីបើកសិក្ខាសាលាផ្សព្វផ្សាយ និងបណ្តុះបណ្តាលស្តីពីគោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្តម លោក លោកស្រីដែលជាថ្នាក់ដឹកនាំក្រសួង, ប្រធានមន្ទីរសាធារណការ និងដឹកជញ្ជូនខេត្ត និងមន្រ្តីជំនាញដែលជាមន្រ្តីបង្គោលមកពីអង្គភាពក្រោមឱវាទក្រសួង។ សិក្ខាសាលានេះត្រូវបានរៀបចំឡើងស្របតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តមរដ្ឋមន្រ្តី ក្នុងគោលបំណងធ្វើការផ្សព្វផ្សាយ និងបណ្តុះបណ្តាលជូនមន្រ្តីបង្គោលមកពីអង្គភាពក្រោមឱវាទក្រសួងនូវ “គោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន (ហៅកាត់ថា ក្របខ័ណ្ឌ M&E-MPWT)” ដែលជាសមិទ្ធផលដ៏សំខាន់មួយទៀតរបស់ក្រសួងសាធារណការ និងដឹកជញ្ជូន សម្រាប់ឱ្យគ្រប់អង្គភាពចំណុះក្រសួងយកទៅអនុវត្តនាពេលខាងមុខឱ្យមានសង្គតិភាព, ប្រសិទ្ធភាព, ស័ក្តិសិទ្ធិភាព និងគណនេយ្យភាព ឆ្លើយតបទៅនឹងយុទ្ធសាស្រ្តបញ្ចកោណ, ផែនការយុទ្ធសាស្រ្តអភិវឌ្ឍន៍ជាតិ ឬគោលនយោបាយ និងផែនការយុទ្ធសាស្រ្តអភិវឌ្ឍន៍វិស័យសាធារណការ និងដឹកជញ្ជូន ឱ្យទទួលបានជោគជ័យទាន់ពេលវេលា។ ថ្លែងក្នុងកម្មវិធីបើកសិក្ខាសាលានេះ ឯកឧត្តមអនុរដ្ឋលេខាធិការ បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គភាពពាក់ព័ន្ធក្នុងការរៀបចំ ក្របខ័ណ្ឌ M&E-MPWT ដ៏មានសារៈសំខាន់នេះឡើង ដែលជាយន្តការ និងជាឧបករណ៍ដ៏ចាំបាច់សម្រាប់ជំរុញ និងវាស់វែងសមិទ្ធកម្មនៃការចូលរួមអនុវត្តគោលនយោបាយរបស់រាជរដ្ឋាភិបាល និងកំពុងចូលរួមយ៉ាងសំខាន់ក្នុងការធានានូវអភិបាលកិច្ច ដែលកំណត់នៅក្នុងវដ្ដនៃការរៀបចំគោលនយោបាយរបស់រាជរដ្ឋាភិបាល (Policy Cycle) ដែលយន្តការនេះនឹងផ្តល់ជូនថ្នាក់ដឹកនាំគ្រប់កម្រិតឱ្យទទួលបាននូវព័ត៌មានមួយដែលមានភាពច្បាស់លាស់ និងជឿទុកចិត្តបាន ដើម្បីគាំទ្រដល់ការរៀបចំផែនការសកម្មភាពអាទិភាព និងការរៀបចំថវិកាជាដើម។ ឯកឧត្តមអនុរដ្ឋលេខាធិការ បានបន្ថែមទៀតថា ក្របខ័ណ្ឌ M&E-MPWT ដែលបានធ្វើការផ្សព្វផ្សាយ និងបណ្តុះបណ្តាលជូនមន្រ្តីបង្គោលនាពេលនេះ ត្រូវបានរៀបចំឡើងដោយមានការពិគ្រោះយោបល់ផ្ទៃក្នុងជាមួយគ្រប់អង្គភាព និងតួអង្គពាក់ព័ន្ធជាច្រើនលើកច្រើនសារ ទាំងក្នុងកម្រិតបច្ចេកទេស និងក្នុងកម្រិតថ្នាក់ដឹកនាំ ដែលអាចចាត់ទុកជាការបោះជំហានលើមាគ៌ាដ៏ត្រឹមត្រូវថ្មីមួយទៀតរបស់ក្រសួងសាធារណការ និងដឹកជញ្ជូន ក្នុងកិច្ចខិតខំប្រឹងប្រែង ប្រកបដោយឆន្ទៈ និងការប្តេជ្ញាចិត្តខ្ពស់ក្នុងការចូលរួមអនុវត្តគោលនយោបាយរបស់រាជរដ្ឋាភិបាល ដោយឈរលើគោលការណ៍រួមគឺ “រួមគិត រួមរៀបចំ រួមអនុវត្ត និងរួមទទួលខុសត្រូវ”៕