(កំពត)៖ ដើម្បីឆ្លើយតបទៅនឹងសំណូមពរដ៏ចាំបាច់របស់ប្រជាពលរដ្ឋក្នុងការធ្វើដំណើរ ក៏ដូចជាដឹកកសិករផលទៅកាន់ទីផ្សារ និងសិស្សានុសិស្ស ក្នុងការធ្វើដំណើរទៅសាលារៀន លោក ខៃ ប៊ុនធឿន សមាជិកក្រុមការងារថ្នាក់ កណ្តាលចុះជួយខេត្តកំពត បានដឹកនាំក្រុមការងាររៀបចំដាក់គ្រឿងចក្រ ចុះជួសជុលសម្រួលឡើងវិញ ផ្លូវក្រាលគ្រួសក្រហមមួយខ្សែប្រវែង ៣៤០០ម៉ែត្រ ឆ្លងកាត់ ៤ភូមិ ស្មើនឹង ២ឃុំ ស្ថិតនៅក្នុងឃុំដំបូកខ្ពស់ និងឃុំដានគោម ស្រុកអង្គរជ័យ ខេត្តកំពត ដើម្បីជួយសម្រួលដល់ប្រជាពលរដ្ឋបានធ្វើដំណើរងាយស្រួលជាងមុន នាឱកាសពិធីបុណ្យកាន់បិណ្ឌ និងភ្ជុំបិណ្ឌនេះ។ ការដាក់គ្រឿងចក្រជួសជុលផ្លូវមួយខ្សែនេះបានធ្វើឡើងនាថ្ងៃទី១៥ ខែកញ្ញា ឆ្នាំ២០២៥ ដោយមានការចូលរួមពីលោក ដាំ មុនីសូដា អភិបាលរងស្រុកអង្គរជ័យ និងអជ្ញាធរមូលដ្ឋានឃុំ ភូមិ និងប្រជាពលរដ្ឋច្រើនរូបទៀត ហើយការចុះជួសជុលផ្លូវនេះ ក្រោមការឧបត្ថម្ភទាំងស្រុងពីលោក ខៃ ប៊ុនធឿន។ នាឱកាសនោះលោក ខៃ ប៊ុនធឿន បានបញ្ជាក់ថា គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី តែតែងបានយកចិត្តទុកដាក់ និងគិតគូរពីសុខទក្ខប្រជាពលរដ្ឋជាប់ជានិច្ច មិនថាប្រជាពលរដ្ឋនៅតំបន់ដាច់ស្រយាលនោះឡើយ។ រយៈពេល៤៦ឆ្នាំកន្លងមកនេះបន្ទាប់ពីថ្ងៃជ័យជំនះ ៧ មករា ១៩៧៩ រាជរដ្ឋាភិបាល និងគណបក្សប្រជាជនកម្ពុជា តែងបានផ្សារភ្ជាប់រួមសុខរួមទុក្ខជាមួយប្រជាពលរដ្ឋ ពុះពារឆ្លងកាត់រាល់ឧបសគ្គ ដឹកនាំប្រទេសឲ្យរួចផុតពីស្ថានភាពដែលវិនាសខ្ទេចខ្ទី ឈានមកដល់ដំណាក់កាល អភិវឌ្ឍន៍លើគ្រប់វិស័យ ប្រកបដោយមោទនភាពជាទីបំផុត។ លោកបន្តថា ក្រោមការដឹកនាំរបស់គណបក្សប្រជាជនកម្ពុជា សមិទ្ធផលថ្មីៗជាច្រើនអនេក រួមមាន៖ ផ្លូវ ស្ពាន ប្រព័ន្ធធារាសាស្រ្ត បណ្តាញទឹកស្អាត អគ្គិសនី ប្រព័ន្ធពត៌មាន រោងចក្រ កសិដ្ឋាន សំណង់តូចធំ មណ្ឌលពាណិជ្ជកម្ម សាលារៀន មន្ទីរពេទ្យ វត្តអារាម ត្រូវបានកសាងពង្រីកទាំងនៅទីក្រុង ទាំងនៅជនបទ និងតំបន់ព្រំដែន។ លោក ខៃ ប៊ុនធឿន បានបញ្ជាក់ថា ផ្លូវគឺជាសរសៃឈាមនៃសេដ្ឋកិច្ចជាតិ មានផ្លូវ គឺមានសង្ឃឹម ដូចនេះការបើកការដ្ឋានជួសជុលផ្លូវលំ គឺដើម្បីសម្រួលដល់ជីវភាពរស់នៅ ការតភ្ជាប់ការធ្វើដំណើរ និងដឹកជញ្ជូនកសិផល របស់ប្រជាពលរដ្ឋនៅឃុំទាំង២នេះ។ ស្របជាមួយគ្នានោះដែរលោកក៏បានអំពាវនាវឱ្យប្រជាពលរដ្ឋទាំងអស់នៅពេលផ្លូវថ្មីជួលជុលហើយ ត្រូវរួមគ្នា ថែរក្សាឱ្យបានគង់វង្សផងដែរ។ សូមជម្រាបថា បងប្អូនពលរដ្ឋទាំង២ឃុំ ក្នុងស្រុកអង្គរជ័យ ខេត្តកំពត បានដាក់ពាក្យស្នើសុំមានចំនួនសរុបចំនួន ៤ខ្សែ ដែលមានប្រវែង ១១.០៥០ម៉ែត្រក្នុងនោះ ខ្សែទី១ មានប្រវែង ៣ ៤០០ម៉ែត្រ ចាប់ពីចំនុចខាងជើងវត្តត្រពាំងត្រគៀត ភូមិត្រពាំងត្រគៀត ភូមិស្បូវអណ្តែត ភូមិតាកោ ឃុំដំបូកខ្ពស់ និងភូមិអង្គខ្ជាយខាងត្បូង ឃុំដានគោម (កំពុងធ្វើ)។ ខ្សែទី២ មានប្រវែង ៤ ០០០ម៉ែត្រ ចំនុចភូមិត្រពាំងត្នោត ទៅភូមិដងទង់ ឃុំដំបូកខ្ពស់ ទល់និងព្រំប្រទល់ស្រុកឈូក, ខ្សែទី៣ ប្រវែង ១ ៨០០ម៉ែត្រ ចំណុច ភូមិត្រពាំងត្នោត និងខ្សែទី៤ មានប្រវែង ១ ៨៥០ម៉ែត្រ ត្រង់ចំនុចភូមិអង្គខ្ចាយខាងជើង ឃុំដានគោម ស្រុកអង្គរជ័យ ខេត្តកំពត៕