ភ្នំពេញ ៖ អ្នកនាំពាក្យក្រសួងសាធារណការនិងដឹកជញ្ជូន បានឱ្យដឹងថា គម្រោងសាងសង់ផ្លូវជាតិលេខ៥ ពីសិរីសោភ័ណ-ប៉ោយប៉ែត សម្រេចវឌ្ឍនភាពការងារបានជាង៣០%ហើយ ដោយក្រុមការងារកំពុងពន្លឿនក្នុងការស្ថាបនាឈានទៅសម្រេចបានតាមផែនការដែលបានគ្រោងទុក។ ឯកឧត្តម ផន រឹម អនុរដ្ឋលេខាធិការ និងជាអ្នកនាំពាក្យក្រសួងសាធារណ ការនិងដឹកជញ្ជូន បានឱ្យដឹងថា កំណាត់ចុងក្រោយ ផ្លូវជាតិលេខ៥ សិរីសោភ័ណ-ប៉ោយប៉ែត ខេត្តបន្ទាយមានជ័យប្រវែង ៣៥គីឡូម៉ែត្រ សម្រចបានលទ្ធផល៣៣,៨%ហើយ គិតត្រឹមចុងខែសីហា ឆ្នាំ២០២៥នេះ។ ឯកឧត្តម បានបន្តថា បើគ្មានការប្រែប្រួលទេ គម្រោងស្តារ និងលើកកម្រិតគុណភាពផ្លូវជាតិលេខ៥ កំណាត់ចុងក្រោយនេះ នឹងបញ្ចប់ក្នុងអំឡុងឆ្នាំ២០២៦ខាងមុខ។ ឯកឧត្តម ក៏សូមអំពាវនាវដល់បងប្អូនប្រជាពលរដ្ឋអ្នកប្រើប្រាស់កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត)បើកបរដោយប្រុងប្រយ័ត្នខ្ពស់ ប្រកបដោយការទទួលខុសត្រួវ ពោលគឺត្រូវបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ និងបើកបរក្នុងល្បឿនសមល្មមកាត់បន្ថយការហុយដី និងខ្ចាយភក់លើបងប្អូនប្រជាពលរដ្ឋរស់នៅតាមដងផ្លូវ និងអ្នកដំណើរដោយយានយន្តធុនស្រាល។ ឯកឧត្តម ក៏បានថ្លែងអំណរគុណដល់បងប្អូនប្រជាពលរដ្ឋរស់នៅតាមសងខាងផ្លូវ និងប្រជាពលរដ្ឋអ្នកដំណើរ ដែលមានការយោគយល់ និងអធ្យាស្រ័យខ្ពស់ ដល់ដំណើរការការដ្ឋានផ្លូវជាតិលេខ៥កំណាត់ចុងក្រោយ នារដូវវស្សាភ្លៀងធ្លាក់ជោគជាំនេះ។ សូមបញ្ជាក់ថា គម្រោងធ្វើឱ្យប្រសើរឡើងវិញផ្លូវជាតិលេខ៥ ត្រូវបានបែងចែកចេញជា ៤ កំណាត់ រួមមាន៖ កំណាត់ពីស្ពានព្រែកក្តាម-ធ្លាម្អម ពោធិ៍សាត់, ធ្លាម្អម-បាត់ដំបង, បាត់ដំបង-សិរីសោភ័ណ ដែល ៣ កំណាត់ខាងលើបានសាងសង់សម្ពោធប្រើប្រាស់រួចរាល់ ចំណែកកំណាត់ចុងក្រោយគឺ សិរីសោភ័ណ-ប៉ោយប៉ែត សម្រេចការងារបានជាង៣០%ហើយ ដែលគ្រោងនឹងបញ្ចប់ការសាងសង់ទាំងស្រុង នៅអំឡុងឆ្នាំ២០២៦ ខាងមុខ។ ការស្ថាបនាកំណាត់ផ្លូវជាតិលេខ៥ សិរីសោភ័ណ-ប៉ោយប៉ែតនេះ ដោយសារវា មានសភាពតូចចង្អៀត នឹងត្រូវពង្រីកទទឹងផ្លូវ ពី២គន្លង ទៅជាផ្លូវ ៤ គន្លងរថយន្ដ និងការងារដាក់បណ្ដាយបង្ហូរទឹកកខ្វក់ផងដែរ៕