កិច្ចប្រជុំប្រចាំខែសីហា ស្តីពីវឌ្ឍនភាពនៃការលក់លេខចុះបញ្ជីយានយន្តរបស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ ទីស្តីការក្រសួង៖ នាថ្ងៃព្រហស្បតិ៍ ទី២៨ ខែសីហា ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ បានអញ្ជើញដឹកនាំកិច្ចប្រជុំពិភាក្សា ប្រចាំខែសីហា ឆ្នាំ២០២៥ ស្តីពីវឌ្ឍនភាពនៃការលក់លេខចុះបញ្ជីយានយន្តរបស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីយានជំនិះ ដោយមានការចូលរួមពី ឯកឧត្តម លោក លោកស្រី ជាអនុប្រធាន ទីប្រឹក្សា និងជាសមាជិកគណៈកម្មការអន្តរក្រសួងផងដែរ។ កិច្ចប្រជុំបានប្រព្រឹត្តទៅតាមរបៀបវារៈមួយចំនួន រួមមាន៖ ១). របាយការណ៍វឌ្ឍនភាពនៃការលក់លេខចុះបញ្ជីរថយន្ត ២). ពិនិត្យ និងពិភាក្សាលើវឌ្ឍនភាពការងាររបស់អនុគណៈកម្មការទាំងពីរ និង ៣). បញ្ហាប្រឈមលើការអនុវត្តការងារលក់លេខចុះបញ្ជីពិសេសផ្ទាល់ខ្លួន សម្រាប់ទោចក្រយានយន្ត ត្រីចក្រយានយន្ត និងម៉ូតូកង់បួន ដែលសមាជិក សមាជិកាគណៈកម្មការអន្តរក្រសួង បានអនុវត្តកន្លងមក ដើម្បីជជែកពិភាក្សា វិភាគលើបញ្ហាប្រឈម ស្វែងរកដំណោះស្រាយ និងលើកទិសដៅការងារបន្ត សំដៅធ្វើឱ្យការងារគ្រប់គ្រងការលក់លេខចុះបញ្ជីយានជំនិះ កាន់តែមានភាពប្រសើរឡើង ជាការរួមចំណែកក្នុងការប្រមូលចំណូលជូនជាតិ។ លោកជំទាវប្រធានអង្គប្រជុំបានថ្លែងអំណរគុណដល់អនុគណៈកម្មការទាំងពីរ ក៏ដូចជាសមាជិកនៃគណៈកម្មការអន្តរក្រសួងទាំងអស់ ដែលបានសហការគ្នារៀបចំកម្មវិធីដាក់ដំណើរការលេខពិសេស និងខិតខំបំពេញតួនាទីភារកិច្ចបានយ៉ាងល្អប្រសើរ៕