កិច្ចប្រជុំពិភាក្សាការងារលើការផ្សព្វផ្សាយសេវាដឹកជញ្ជូន និងចែកចាយបញ្ញើប្រៃសណីយ៍ ដើម្បីបង្ខិតសេវាសាធារណៈរបស់រដ្ឋឱ្យកាន់តែជិតប្រជាពលរដ្ឋ ទីស្តីការក្រសួង៖ នារសៀលថ្ងៃអង្គារ ទី២៩ ខែកក្កដា ឆ្នាំ២០២៥ ឯកឧត្តម ឈួន វិន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន បានទទួលជួបពិភាក្សាការងារលើការផ្សព្វផ្សាយសេវាដឹកជញ្ជូន និងចែកចាយបញ្ញើប្រៃសណីយ៍ ជាមួយប្រតិភូក្រសួងប្រៃសណីយ៍ និងទូរគមនាគន៍ ដឹកនាំដោយ ឯកឧត្តម ផេន សំវិសុទ្ធ អគ្គនាយកប្រៃសណីយ៍កម្ពុជា ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធជាច្រើនរូប។ ជំនួបពិភាក្សាការងារនេះ រៀបចំឡើងក្នុងគោលបំណងដើម្បីសិក្សាស្វែងយល់អំពីលទ្ធភាពបង្កើតឱកាសនៃកិច្ចសហប្រតិបត្តិការបន្ថែមសំដៅពង្រឹង និងពង្រីកសាធារណៈរបស់រដ្ឋបង្ខិតឱ្យកាន់តែជិតប្រជាពលរដ្ឋដែលផ្ដល់នូវភាពងាយស្រួល ចំណេញពេលវេលា ប្រកបដោយសុវត្ថិភាព និងប្រសិទ្ធភាពខ្ពស់ ក្នុងការផ្ដល់សេវាដឹកជញ្ជូន និងចែកចាយបញ្ញើប្រចាំថ្ងៃនៅក្នុងប្រទេស។ ជាលទ្ធផលឯកឧត្តមរដ្ឋលេខាធិការ បានបង្ហាញពីការគាំទ្រឱ្យពង្រីកបណ្តាញបញ្ញើនៅកាន់បណ្ដាខេត្តនានាបន្ថែមទៀតនៅទូទាំងប្រទេសកម្ពុជា ព្រមទាំងរៀបចំឱ្យមានក្រុមការងារបច្ចេកទេសសិក្សាលើការងារនេះជាមួយអង្គភាពពាក់ព័ន្ធ ដើម្បីពន្លឿនកិច្ចការងារនេះកាន់តែរីកចម្រើនថែមទៀត៕