ក្រសួងសាធារណការ និងដឹកជញ្ជូន បង្កើតគណៈកម្មការទទួលបន្ទុកយេនឌ័រ និងយន្តការគាំទ្រ ដើម្បីលើកកម្ពស់សមភាពយេនឌ័រ ទីស្ដីការក្រសួង៖ នាថ្ងៃពុធ ទី២៣ ខែកក្កដា ឆ្នាំ ២០២៥ លោកជំទាវ មឹន មាណវី រដ្ឋលេខាធិការ និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្រ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រកាសសេចក្តីសម្រេចស្តីពីការបង្កើតគណៈកម្មការទទួលបន្ទុកយេនឌ័រ និងយន្តការគាំទ្រនៃក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំក្រសួង តំណាងនារីមកពីអង្គភាពចំណុះក្រោមឱវាទក្រសួង និងតំណាងនារីមកពីមន្ទីរសាធារណការ និងដឹកជញ្ជូន រាជធានី/ខេត្ត និងមន្ត្រីពាក់ព័ន្ធជាច្រើនរូបផងដែរ។ កិច្ចប្រជុំនេះ រៀបចំឡើងក្នុងគោលបំណងប្រកាសសេចក្តីសម្រេចស្តីពីការបង្កើតគណៈកម្មការទទួលបន្ទុកយេនឌ័រ និងយន្តការគាំទ្រនៃក្រសួងសាធារណការ និងដឹកជញ្ជូន ដែលបានធ្វើបច្ចុប្បន្នភាពសមាសភាពសមាជិកគណៈកម្មការស្របតាមសមាសភាពថ្នាក់ដឹកនាំក្រសួងនីតិកាលទី៧ និងការបែងចែកតួនាទី ភារកិច្ចរបស់អនុគណៈកម្មការនីមួយៗ។ នាឱកាសនោះ លោកជំទាវប្រធានអង្គប្រជុំ ក៏បានរំលេចឡើងនូវសកម្មភាពការងារចម្បងមួយចំនួនដែលគណៈកម្មកាគ្រោងនឹងអនុវត្តនៅក្នុងឆ្នាំ២០២៥ រួមមាន៖ ការធ្វើបច្ចុប្បន្នភាពផែនការយុទ្ធសាស្ត្របញ្ជ្រាបយេនឌ័រក្រសួង ការផ្តល់វគ្គបណ្តុះបណ្តាលភាពជាអ្នកដឹកនាំរបស់ស្ត្រីក្នុងអភិបាលកិច្ចនៃវិស័យដឹកជញ្ជូន និងសាធារណការ និងការជ្រើសរើសបុរសគំរូដែលចូលរួមសកម្មក្នុងការលើកកម្ពស់សមភាពយេនឌ័រ៕