ថ្នាក់ដឹកនាំក្រសួងចុះត្រួតពិនិត្យវឌ្ឍនភាពគម្រោងលើកកម្ពស់ការផ្គត់ផ្គង់ទឹកស្អាត និងអនាម័យខេត្តសៀមរាប សៀមរាប ៖ នាថ្ងៃទី១១ ខែកក្កដា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញដឹកនាំគណៈប្រតិភូក្រសួង ដើម្បីចូលរួមក្នុងដំណើរបេសកកម្មគាំទ្រការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) របស់ក្រុមការងារធនាគារពិភពលោកទៅកាន់ខេត្តសៀមរាប ដែលដឹកនាំដោយលោកស្រី Maria Angelica Sotomayor, World Bank Water Practice Manager for East Asia and Pacific Region ដោយការអញ្ជើញចូលរួមពី ឯកឧត្តមអនុរដ្ឋលេខាធិការ ក្រុមការងារគ្រប់គ្រងគម្រោង WaSSIP ក្រុមការងារធនាគារពិភពលោក តំណាងConsultant ក្រុមហ៊ុនម៉ៅការសាងសង់ ក្រុមហ៊ុនទីប្រឹក្សា មន្ត្រីជំនាញ នៃអគ្គនាយកដ្ឋានប្រព័ន្ធចម្រោះទឹកកខ្វក់ និងតំណាងមន្ទីរសាធារណការ និងដឹកជញ្ជូនខេត្តសៀមរាប។ គោលបំណងនៃដំណើរបេសកកម្មនេះគឺ ដើម្បីចុះត្រួតពិនិត្យអំពីវឌ្ឍនភាពការងាររបស់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ដែលរួមមាន ៖ ១). ការចុះពិនិត្យការអនុវត្តការងារសាងសង់របស់អនុគម្រោង CW-1A ២). ការចុះជួបដោយផ្ទាល់តាមខ្នងផ្ទះរបស់បងប្អូនប្រជាពលរដ្ឋ ដែលបាន និងកំពុងទទួលផលពីការអនុវត្តគម្រោង ៣). ការចុះពិនិត្យវឌ្ឍនភាពរបស់ស្ថានីយបូមទឹកកខ្វក់ វត្តចក និង ៤). ទស្សនកិច្ចនៅទីតាំងស្ថានីយប្រព្រឹត្តកម្មទឹកកខ្វក់ខេត្តសៀមរាប៕