សេចក្តីជូនដំណឹងពី៖ ការដាក់ឲ្យប្រើប្រាស់ជាបណ្តោះអាសន្ននូវ "ស្ពានអាកាស សម្តេចធិបតី ហ៊ុន ម៉ាណែត" ស្ពានអាកាស សម្តេចធិបតី ហ៊ុន ម៉ាណែត មានទីតាំងស្ថិតនៅ ត្រង់ចំណុចប្រសព្វរវាង មហាវិថី សម្តេចតេជោ ហ៊ុន សែន និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល ត្រូវបានស្ថាបនាជា ស្ពានភ្លោះទ្វេទិស និងត្រូវបានបើកការដ្ឋានសាងសង់ កាលពីថ្ងៃទី ១៧មិថុនាឆ្នាំ២០២៤ ដោយមានក្រុមហ៊ុន OCIC ជាអ្នកទទួលការសាងសង់។ បច្ចុប្បន្ន គម្រោងស្ពានអាកាសភ្លោះមួយនេះ សម្រេចបានលទ្ធផលសាងសង់ដូចតទៅ៖ - ស្ពានអាកាសទី១ សម្រេចបានការសាងសង់ ១០០% ហើយ - ស្ពានអាកាសទី២ គ្រោងបញ្ចប់ការសាងសង់ នៅដើមខែសីហាឆ្នាំ២០២៥ នេះ ដើម្បីសម្រួលដល់ ចរាចរណ៍របស់ប្រជាពលរដ្ឋ ពិសេសនៅក្នុងឱកាសបុណ្យភ្ជុំបិណ្ឌ នាពេលខាងមុខនេះ សម្តេច មហាបវរធិបតីនាយករដ្ឋមន្ត្រី បានផ្តល់អនុសាសន៍ ដល់រដ្ឋបាលរាជធានីភ្នំពេញឲ្យដាក់ប្រើប្រាស់ ជាបណ្តោះអាសន្ន នូវស្ពានអាកាសមួយនេះ តាមកាលបរិច្ឆេទដូចតទៅ៖ - ស្ពានអាកាសទី១ ដែលសាងសង់រួច មានទិសដៅចរាចរណ៍តាមបណ្តោយមហាវិថី សម្តេចតេជោ ហ៊ុន សែន ឆ្លងកាត់ផ្លូវជាតិលេខ២ ឆ្ពោះទៅអាកាសយានដ្ឋានអន្តរជាតិតេជោ នឹងដាក់ឲ្យប្រើប្រាស់ជាបណ្តោះអាសន្ន ចាប់ពីថ្ងៃទី ១១កក្កដាឆ្នាំ២០២៥ នេះតទៅ - ស្ពានអាកាសទី២ មានទិសដៅចរាចរណ៍ពី អាកាសយានដ្ឋានអន្តរជាតិតេជោ ឆ្លងកាត់ផ្លូវជាតិលេខ២ ឆ្ពោះទៅមហាវិថី សម្តេចតេជោ ហ៊ុន សែន ចូលមករាជធានីភ្នំពេញ នឹងបើកឲ្យប្រើប្រាស់ជាបណ្តោះអាសន្ន ចាប់ពីថ្ងៃទី ១៥សីហាឆ្នាំ២០២៥ តទៅ។