បាឋកថា ស្តីពី "ការរៀបចំ និងគ្រប់គ្រងកម្មវិធី" ជូនដល់និស្សិតវិទ្យាស្ថានតេជោសែន សាធារណការ និងដឹកជញ្ជូន ទាំង៥ជំនាន់ សាលសហសិក្សាតេជោសែន៖ នាថ្ងៃពុធ ទី០៩ ខែកក្កដា ឆ្នាំ២០២៥ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីភាពក្នុងបាឋកថា ស្តីពី "ការរៀបចំ និងគ្រប់គ្រងកម្មវិធី" ជូនដល់និស្សិតវិទ្យាស្ថានតេជោសែន សាធារណការ និងដឹកជញ្ជូន។ កម្មវិធីនេះត្រូវបានផ្ដល់កិត្ដិយអញ្ជើញធ្វើជាវាគ្មិនពីសំណាក់ កញ្ញា គីន សំណាង សមាជិកគណៈកម្មាធិការកណ្ដាលសហភាពសហព័ន្ធយុវជនកម្ពុជា និងជាអនុប្រធានការិយាល័យ នៃនាយកដ្ឋានអភិវឌ្ឍន៍យុវជន និងកម្មវិធី នៃសហភាពសហព័ន្ធយុវជនកម្ពុជា និងមានការអញ្ជើញចូលពី ថ្នាក់ដឹកនាំវិទ្យាស្ថាន បុគ្គលិក និងនិស្សិតវិទ្យាស្ថាន សរុបចំនួន ១៥០នាក់។ បាឋកថានេះផ្តោតសំខាន់លើការជួយជំរុញដល់និស្សិតក្នុងការរៀបចំ គ្រប់គ្រងកម្មវិធី ប្រកបដោយទំនុកចិត្ត និងមានភាពក្លាហាន ក៏ដូចជាដើម្បីបង្កើននូវចំណេះជំនាញ ដែលជាបំណិនជីវិតក្នុងការអភិវឌ្ឍខ្លួនជាមួយមនុស្សជុំវិញខ្លួនឱ្យមានប្រសិទ្ធភាព គុណភាព ស្របតាមតម្រូវការ និងការអភិវឌ្ឍសង្គមជាតិ ដែលទាំងនេះសុទ្ធសឹងតែជាប្រធានបទគួរឱ្យចាប់អារម្មណ៍ និងគួរសិក្សាស្វែងយល់បន្ថែម។ ក្នុងឱកាសនេះដែរ ឯកឧត្តមនាយកបានលើកយកយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលបានកំណត់អាទិភាពគន្លឹះ “ការអភិវឌ្ឍមូលធនមនុស្ស” ក្នុងចំណោមអាទិភាពគន្លឹះចំនួន៥ ហើយក៏ជាលក្ខខណ្ឌចាំបាច់មិនអាចខ្វះបានសម្រាប់ជំរុញកំណើនសេដ្ឋកិច្ចប្រកបដោយភាពធន់ និងបរិយាបន្ន។ ជាមួយគ្នានេះដែរ ឯកឧត្តមនាយក បានជំរុញ និងលើកទឹកចិត្តដល់និស្សិតគ្រប់ជំនាន់ឱ្យខិតខំប្រែងសិក្សារៀនសូត្រ ជាការឆ្លើយតបទៅនឹងការខិតខំប្រឹងប្រែងរបស់ប្រមុខរដ្ឋាភិបាល ព្រោះជំនាញសិក្សានៅវិទ្យាស្ថាន សុទ្ធតែជាជំនាញប្រកបដោយសក្តានុពលសមស្របនឹងកាលៈទេសៈបរិបទកម្ពុជា នាពេលបច្ចុប្បន្ន៕