ក្រុមមន្រ្តីនៃក្រសួងសាធារណការ និងដឹកជញ្ជូន បានប្រាប់ដល់ម្ចាស់អាជីវកម្ម ឬម្ចាស់រថយន្តធំកុំដឹកទំនិញលើសកំណត់លើផ្លូវជាតិលេខ៤៨ ស្ថិតនៅឃុំបឹងព្រាវ ស្រុកស្រែអំបិល ខេត្តកោះកុង។ ខណៈផ្លូវជាតិលេខ៤៨ស្ថាបនាជិតរួចរាល់ស្ទើរតែ១០០ភាគរយហើយនោះ មន្រ្តីជំនាញ បានផ្តល់ដំណឹងដល់ក្រុមម្ចាស់អាជីវកម្ម និងម្ចាស់រថយន្តធន់ធ្ងន់កុំដឹកលើទម្ងន់កំណាត់អោយសោះ ដើម្បីរក្សាគុណភាពផ្លូវប្រើប្រាស់បានអង្វែងទៅ។លោក តាំង ពៅ ប្រធានលេខាធិការដ្ឋានគ្រប់គ្រងជញ្ជីងចល័ត និងអចល័តរបស់ក្រសួងសាធារណការនិងដឹកជញ្ជូន បានឱ្យដឹងនៅល្ងាចថ្ងៃទី១០ ខែមិថុនា ឆ្នាំ២០២៥ថា លោកបានឃាត់រថយន្តធន់ធំជាង២០គ្រឿងដឹកជញ្ជូនខ្សាច់ ថ្ម លើផ្លូវជាតិលេខ៤៨ ដោយសង្ស័យថា ផ្ទុកលើសទម្ងង់កំណត់បណ្តាលឱ្យឆាប់ខូចខាតផ្លូវដែលទើបស្ថាបនារួចរាល់។បើតាមលោក តាំង ពៅ ជាលទ្ធផលនៃការត្រួតពិនិត្យថ្លឹងទម្ងន់តាមលក្ខណៈបច្ចេកទេស គឺរកឃើញរថយន្ត២គ្រឿងប៉ុណ្ណោះដែលដឹកលើសទម្ងន់ ក្នុងចំណោមជាង២០គ្រឿងដែលឃាត់បាន។ បែបនេះក្តី តបតាមការណែនាំរបស់លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន បានអនុគ្រោះគ្រាន់តែធ្វើការអប់រំណែនាំពុំមានការផាកពិន័យនោះទេ និងអនុញ្ញាត្តបន្តដំណើរទៅមុខ។ទន្ទឹមនោះ មន្រ្តីជាន់ខ្ពស់ក្រសួងសាធារណការ ក៏អំពាវនាវដល់អាជីវករ និងម្ចាស់រថយន្តធន់ធ្ងន់ទាំងអស់ មេត្តាសុំកុំដឹកលើសទម្ងន់កំណត់ដែលច្បាប់ហាមឃាត់ ចៀសវាងរងការផាកពិន័យដែលនាំឱ្យខាតបង់ថវិកា និងពេលវេលាធ្វើអាជីវកម្មរបស់ខ្លួន។គួរជម្រាបថា នេះលើកដំបូងហើយ ក្រុមជំនាញរបស់ក្រសួងសាធារណ សហការជាមួយមន្ទីរសាធារណ និងដឹកជញ្ជូនខេត្តកោះកុង ស្ថានីយ៍ជញ្ជីងថ្លឹងរថយន្តបឹងឃុនឆាង និងកម្លាំងប្រដាប់អាវុធចុះប្រតិបត្តិការឃាត់រថយន្តធន់ធ្ងន់ដឹកលើសទម្ងង់កំណត់លើកំណាត់ផ្លូវជាតិលេខ៤៨ ដែលទើបស្ថាបនាជិតរួចរាល់។ ជាក់ស្តែង ក្រសួងសាធារណការ បានដំឡើងស្ថានីយថ្លឹងរថយន្ត២កន្លែង ទី១នៅស្ថានីយថ្លឹងរថយន្តនៅផ្លូវជាតិលេខ៤៨ ឃុំបឹងព្រាវ ស្រុកស្រែអំបិល និងទី២ នៅផ្លូវជាតិលេខ១០ ស្ថិតនៅភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង៕