កិច្ចប្រជុំក្រុមការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយ របស់ក្រសួងសាធារណការ និងដឹកជញ្ជូន(ក.យ.ផ.គ.សកដ.) ទីស្តីការក្រសួង៖ នាថ្ងៃព្រហស្បតិ៍ ទី២០ ខែមីនា ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាអនុប្រធានប្រចាំការ ក.យ.ផ.គ.សកដ. បានអញ្ជើញដឹកនាំកិច្ចប្រជុំ ក.យ.ផ.គ.សកដ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ដែលជាសមាជិក ក.យ.ផ.គ.សកដ. និងតំណាងអង្គភាពថ្នាក់ជាតិ សរុប ៦០រូប។ កិច្ចប្រជុំនេះរៀបចំឡើងដើម្បីពិនិត្យពិភាក្សាលម្អិត និងអនុម័តលើសេចក្តីព្រាងផែនការសកម្មភាពអាទិភាពឆ្នាំ២០២៥ របស់អង្គភាពថ្នាក់ជាតិក្រោមឱវាទក្រសួង ចំនួន១៤អង្គភាព។ នៅក្នុងកិច្ចប្រជុំ ឯកឧត្តមអនុរដ្ឋលេខាធិការ ព្រមទាំងឯកឧត្តម លោកជំទាវ និងលោក លោកស្រីដែលជា សមាជិក ក.យ.ផ.គ.សកដ. និងតំណាងគ្រប់អង្គភាព បានធ្វើការពិភាក្សាផ្លាស់ប្តូរយោបល់យ៉ាងផុសផុល និងបានឯកភាពលើសេចក្តីព្រាងផែនការសកម្មភាពអាទិភាពឆ្នាំ២០២៥ របស់អង្គភាពទទួលបន្ទុករៀងខ្លួន ដើម្បីឱ្យលេខាធិការដ្ឋានបូកសរុបគោរពជូនលោកជំទាវររដ្ឋលេខាធិការប្រចាំការ និងជាប្រធាន ក.យ.ផ.គ.សកដ. ពិនិត្យ និងផ្តល់ការណែនាំបន្ថែម មុននឹងបន្តនីតិវិធីគោរពស្នើសុំការសម្រេចដ៏ខ្ពង់ខ្ពស់ពី ឯកឧត្តមរដ្ឋមន្រ្តី៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube