ដែនជម្រកសត្វព្រៃកែវសីមា ជាទីតាំងមួយដ៏សំខាន់សម្រាប់ជីវចម្រុះ និងសហគមន៍ជនជាតិដើមភាគតិចព្នង ដែលមានជីវភាពរស់នៅ ជំនឿ វប្បធម៌ ប្រពៃណីផ្សាភ្ជាប់ជាមួយនឹងធនធានធម្មជាតិដ៏សម្បូរបែបនៅក្នុងតំបន់ ហើយក៏ជាជម្រករបស់សត្វព្រៃជាង ១.០០០ប្រភេទ រួមមានប្រភេទសត្វកម្រៗ និងជិតផុតពូជដូចជា សត្វស្វាកន្ទុយស ដំរីអាស៊ី ក្ងោកបៃតង និងប្រភេទងាយរងគ្រោះជាច្រើនទៀតដូចជា ទោចថ្ពាល់លឿង ស្វាត្រោស។ សូមជម្រាបជូនថា ដែនជម្រកសត្វព្រៃកែវសីមា មានផ្ទៃដីទំហំ ៣១៧ ៤៥៦ហិកតា (យោងតាមអនុក្រឹត្យប្រព័ន្ធតំបន់ការពារធម្មជាតិ ឆ្នាំ២០២៣) មានទីតាំងស្ថិតនៅក្នុងខេត្តមណ្ឌលគិរី និងខេត្តក្រចេះ ភាគខាងកើតនៃប្រទេសកម្ពុជា។ ចំណែកអាកាសធាតុវិញ មានលក្ខណៈត្រជាក់ខ្លាំងនៅចន្លោះខែតុលា ដល់ខែមករា និងមានភ្លៀងធ្លាក់បង្គួរក្នុងអំឡុងខែកក្កដា ដល់ខែវិច្ឆិកា បង្កជាទស្សនីយភាព និងបរិយាកាសត្រជាក់ស្រស់ស្រាយគួរជាទីចង់គយគន់។ ចូលរួមទាំងអស់គ្នាក្នុងកិច្ចការពារអភិរក្សសត្វព្រៃ និងព្រៃឈើដែលជាសម្បត្តិដ៏មហាសាលដែលបុព្វបុរសយើងបានបន្សល់ទុក ដើម្បីបន្តអោយកូនចៅជំនាន់ក្រោយបានស្គាល់ និងទទួលបានផលប្រយោជន៍ពីធនធានធម្មជាតិទាំងនេះដូចយើងដែរ៕ ប្រភពពី៖ គម្រោងរេដបូក កែវសីមា I Keo Seima REDD+