គណៈប្រតិភូជាន់ខ្ពស់ក្រសួងសាធារណការ និងដឹកជញ្ជូន ចុះសិក្សា និងជួបពិភាក្សាការងារជាមួយឣាជ្ញាធរ និងមន្រ្តីមានសមត្ថកិច្ចពាក់ព័ន្ធ ស្ដីពីស្ថានភាពនៃប្រតិបត្តិការដឹកជញ្ជូនឆ្លងកាត់ព្រំដែន នៅច្រកទ្វារព្រំដែនឣន្តរជាតិត្រពាំងផ្លុង និងភ្នំដិន ខេត្តត្បូងឃ្មុំ និងតាកែវ៖ នាថ្ងៃទី១១ ដល់១២ ខែមីនា ឆ្នាំ២០២៥ គណៈប្រតិភូជាន់ខ្ពស់របស់ក្រសួង ដឹកនាំដោយ ឯកឧត្តម ប៉ែន បូរាណ និង ឯកឧត្តម វ៉ាស៊ឹម សុរិយា អនុរដ្ឋលេខាធិការ សាធារណការ និងដឹកជញ្ជូន ដោយមានការចូលរួមពីមន្ត្រីជំនាញក្រសួង និងអ្នកជំនាញការទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) ក្នុងក្របខណ្ឌជំនួយបច្ចេកទេសលើគម្រោងស្ដីពីការពង្រឹងសមត្ថភាពក្នុងការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ដំណាក់កាលទី៣ (SF-CLIP) បានអញ្ជើញចុះសិក្សា និងជួបប្រជុំពិភាក្សាការងារជាមួយរដ្ឋបាលខេត្ត ប្រធានទីស្នាក់ការត្រួតពិនិត្យ និងមន្រ្តីមានសមត្ថកិច្ចពាក់ព័ន្ធប្រចាំការច្រកទ្វារព្រំដែនអន្តរជាតិ អំពីស្ថានភាពនៃប្រតិបត្តិការដឹកជញ្ជូនឆ្លងកាត់ព្រំដែន នៅច្រកទ្វារព្រំដែនឣន្តរជាតិត្រពាំងផ្លុង (ខេត្តត្បូងឃ្មុំ) និងភ្នំដិន (ខេត្តតាកែវ)។ បេសកកម្មនេះធ្វើឡើងក្នុងគោលបំណង ដើម្បីស្វែងយល់អំពីស្ថានភាពបច្ចុប្បន្ន ផែនការអភិវឌ្ឍ និងបញ្ហាប្រឈមនានា ពាក់ព័ន្ធនឹងប្រតិបត្តិការដឹកជញ្ជូនឆ្លងកាត់ព្រំដែនរវាងប្រទេសកម្ពុជា និងវៀតណាម នៅច្រកទ្វារព្រំដែនអន្តរជាតិទាំងពីរខាងលើ សំដៅធ្វើឱ្យកាន់តែប្រសើរឡើងនូវសមត្ថភាពនៃប្រព័ន្ធភស្តុភារកម្ម ដើម្បីឆ្លើយតបនឹងកំណើនពាណិជ្ជកម្មនៅតាមច្រកព្រំដែនអន្តរជាតិនានារវាងប្រទេសកម្ពុជា និងប្រទេសជិតខាង។ សូមបញ្ជាក់ជូនថា ក្រសួងសាធារណការ និងដឹកជញ្ជូន បាន និងកំពុងបន្តពង្រឹងកិច្ចសហការជាមួយអាជ្ញាធរ សមត្ថកិច្ចពាក់ព័ន្ធ និងដៃគូអភិវឌ្ឍន៍នានា ក្នុងការពង្រឹង និងពង្រីកការសាងសង់ហេដ្ឋារចនាសម្ព័ន្ធ និងការងារដឹកជញ្ជូនឆ្លងកាត់ព្រំដែនឱ្យកាន់តែមានប្រសិទ្ធភាព និងស័ក្តិសិទ្ធិភាព សំដៅជួយសម្រួលដល់ការដឹកជញ្ជូន ការធ្វើពាណិជ្ជកម្ម និងទេសចរណ៍ឆ្លងកាត់ព្រំដែនជាអន្តរជាតិឱ្យកាន់តែប្រសើរឡើងនូវសមត្ថភាពនៃប្រព័ន្ធភស្តុភារកម្មកម្ពុជា រួមចំណែកការធ្វើសមាហរណកម្មសេដ្ឋកិច្ចជាមួយប្រទេសជិតខាង និងក្នុងតំបន់ ស្របតាមអនុសាសន៍ណែនាំ និងការចង្អុលបង្ហាញដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីកំឡុងខែមករា ឆ្នាំ២០២៥ កន្លងទៅ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube