មន្ត្រីជំនាញក្រសួងសាធារណការ និងដឹកជញ្ជូន បានបញ្ចប់ការបណ្តុះបណ្តាលស្តីពីការរចនាផ្លូវ ដើម្បីពង្រឹងសមត្ថភាពការងារសាងសង់ហេដ្ឋារចនាសម្ព័ន្ធផ្លូវថ្នល់ ទីស្តីការក្រសួង៖នាថ្ងៃសុក្រ ទី៧ ខែមីនា ឆ្នាំ២០២៥ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីពិធីបិទវគ្គបណ្តុះបណ្តាលស្តីពីការរចនាផ្លូវ ដល់មន្ត្រីជំនាញក្រសួងសាធារណការ និងដឹកជញ្ជូន ដើម្បីពង្រឹងសមត្ថភាពការងារសាងសង់ហេដ្ឋារចនាសម្ព័ន្ធផ្លូវថ្នល់ តាមរយៈកម្មវិធីភាពជាដៃគូសម្រាប់ហេដ្ឋារចនាសម្ព័ន្ធផ្លូវថ្នល់ (P4I) & Austroads នៃប្រទេសអូស្រ្ដាលី ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។ វគ្គបណ្តុះបណ្តាលមានរយៈពេល៥ថ្ងៃ ចាប់ពីថ្ងៃទី៣ ដល់ថ្ងៃទី៧ ខែមីនា ឆ្នាំ២០២៥ ដោយបានសិក្សាជាសំខាន់ទៅលើការធរណីមាត្រផ្លូវថ្នល់ រួមមានការសិក្សាអ័ក្សផ្លូវ (ផ្តេក និងបញ្ឈរ) ការរចនាផ្លូវឆ្លងកាត់ និងបទដ្ឋានផ្លូវថ្នល់ផ្សេងៗទៀត ដោយផ្តោតជាសំខាន់ទៅលើការអនុវត្តចំពោះគម្រោងជាក់ស្តែង និងធ្វើបច្ចុប្បន្នភាពឱ្យសមស្របតាមតម្រូវការស្ថានភាពបច្ចុប្បន្នក្នុងប្រទេស ក៏ដូចជាបរិបទក្នុងតំបន់ សំដៅកសាងហេដ្ឋារចនាសម្ព័ន្ធផ្លូវថ្នល់ប្រកបដោយគុណភាព និងប្រសិទ្ធភាពខ្ពស់។ វិធីសាស្រ្តនៃការបណ្តុះបណ្តាលបានអនុញ្ញាតឱ្យមន្រ្តីជំនាញ អនុវត្តដោយផ្ទាល់នូវគោលគំនិត និងបច្ចេកទេសចំពោះបញ្ហាប្រឈមដែលពួកគេជួបប្រទះក្នុងការងារប្រចាំថ្ងៃ និងអាចធានាបានថាការបណ្តុះបណ្តាលនឹងអាចយកទៅប្រើជាក់ស្តែងនៅក្នុងការអនុវត្តការរចនាផ្លូវនៅទូទាំងប្រទេស៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube