សិក្ខាសាលាស្ដីពី “ ការរៀបចំផលិតមាតិកាផ្សព្វផ្សាយក្នុងបណ្ដាញសង្គម និងបច្ចេកទេសក្នុងការថតរូប និងផលិតវីដេអូនានា” ទីស្តីការក្រសួង៖ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្ដម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន នាថ្ងៃសុក្រ ទី២១ ខែកុម្ភៈ ឆ្នាំ២០២៥ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលា ស្ដីពី “ការរៀបចំផលិតមាតិកាផ្សព្វផ្សាយ ក្នុងបណ្ដាញសង្គម និងបច្ចេកទេសក្នុងការថតរូប និងផលិតវីដេអូនានា” ជូនដល់មន្ដ្រីរាជការ និងបុគ្គលិក ទាំងអស់របស់វិទ្យាស្ថាន ព្រមទាំងមានការអញ្ជើញចូលរួមពី លោកស្រីនាយិការងវិទ្យាស្ថាន និងលោក-លោកស្រី ជាបុគ្គលិក មន្ត្រីរាជការជាច្រើនរូប។ វគ្គបណ្ដុះបណ្ដាលនេះ ធ្វើឡើងក្នុងគោលបំណង ដើម្បីពង្រឹងការផ្សព្វផ្សាយឱ្យមានប្រសិទ្ធភាពនៅលើបណ្ដាញសង្គម តាមរយៈបច្ចេកទេស នៃការសរសេរអត្ថបទ ការប្រើប្រាស់រូបភាព ការចុះផ្សាយ និងវិធានការសុវត្ថិភាពបច្ចេកវិទ្យា។ ថ្លែងទៅកាន់អង្គពិធី ឯកឧត្ដមនាយកវិទ្យាស្ថាន បានលើកឡើងពីការងារបណ្ដាញសង្គម ជាការងារសំខាន់ ដើម្បីផ្សព្វផ្សាយការងារពាក់ព័ន្ធ និងសមិទ្ធិផលនានារបស់វិទ្យាស្ថាន ហើយសិក្ខាសាលានាថ្ងៃនេះ គឺជាចំណុចដែលថ្នាក់ដឹកនាំក្រសួង តែងតែណែនាំ និងលើកទឹកចិត្ដឱ្យអនុវត្ដប្រកបដោយប្រសិទ្ធភាព និងការយកចិត្ដទុកដាក់ខ្ពស់ក្នុងការសរសេរមាតិកា និង ការផលិតមាតិកា ការប្រមូលព័ត៌មាន និងវិធីសាស្រ្ដសរសេររាយការណ៍ពីព្រឹត្ដិការណ៍ និងបច្ចេកទេសក្នុងការថតរូប និងវីដេអូអំពីសមិទ្ធិផលរបស់វិទ្យាស្ថាន និងការងារពាក់ព័ន្ធឱ្យសមស្របតាមស្ថានភាព និងព្រឹត្ដិការណ៍នានា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube