កម្ពុជាកំពុងជំរុញការរៀបចំប្រព័ន្ធច្បាប់គ្រប់គ្រងការធ្វើអាជីវកម្មកំពង់ផែទន្លេ ដើម្បីជួយលើកកម្ពស់វិស័យដឹកជញ្ជូនទំនិញតាមផ្លូវទឹកពីកម្ពុជាទៅទីផ្សារអន្តរជាតិ ខណៈដំណើរការសាងសង់គម្រោងព្រែកជីកហ្វូណន តេជោ ដែលជាផ្លូវទឹកតភ្ជាប់ពីកំពង់ផែទន្លេ(កំពង់ផែស្វយ័តក្រុងភ្នំពេញ)ទៅកំពង់ផែសមុទ្រអន្តរជាតិ កំពុងបោះជំហានទៅមុខដោយសន្សឹមៗ។នៅទីស្តីការក្រសួងសេដ្ឋកិច្ច និងហិរញ្ញវត្ថុ នាថ្ងៃទី១៣ ខែកុម្ភៈ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) បានដឹកនាំកិច្ចប្រជុំ គ.ស.ហ. ដើម្បីពិនិត្យ និងពិភាក្សាលើវឌ្ឍនភាពនៃការរៀបចំ និងកែសម្រួលសេចក្តីព្រាង«ក្របខណ្ឌនៃការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា» ដោយមានការចូលរួមពីថ្នាក់ដឹកនាំក្រសួង-ស្ថាប័នពាក់ព័ន្ធជាច្រើន។ សេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា«ក្របខណ្ឌនៃការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា» ត្រូវបានរៀបចំឡើងក្នុងគោលដៅជំរុញដល់ការអនុវត្តច្បាប់ស្តីពីការដឹកជញ្ជូនតាមផ្លូវទឹក។ ក្របខណ្ឌនេះមានគោលបំណងពង្រីក និងបង្កើនការប្រើប្រាស់ប្រព័ន្ធដឹកជញ្ជូនតាមផ្លូវទឹក តាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូនតាមផ្លូវទឹក លើកកម្ពស់ប្រសិទ្ធភាពសេវាកំពង់ផែ ដោយការប្រើប្រាស់បច្ចេកវិទ្យាទំនើប និងការកាត់បន្ថយចំណាយឡូជីស្ទីក សំដៅរួមចំណែកទ្រទ្រង់ចីរភាពនៃកំណើនសេដ្ឋកិច្ចកម្ពុជាក្នុងរយៈពេលវែង និងបង្កើនសមត្ថភាពប្រកួតប្រជែងក្នុងតំបន់ និងសកល។ លោក អូន ព័ន្ធមុនីរ័ត្ន បានលើកឡើងក្នុងកិច្ចប្រជុំថា ក្របខណ្ឌនៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេ គឺមានសារៈសំខាន់ និងចាំបាច់សម្រាប់ជំរុញការអភិវឌ្ឍវិស័យដឹកជញ្ជូនតាមកំពង់ផែទន្លេ ទាំងសម្រាប់រយៈពេលខ្លី មធ្យម និងវែង។ ហេតុនេះក្រសួង-ស្ថាប័នជំនាញ និងអ្នកពាក់ព័ន្ធត្រូវតែខិតខំធ្វើការរួមគ្នាដើម្បីធ្វើឱ្យសេចក្តីព្រាងនៃឯកសារក្របខណ្ឌនេះកាន់តែមានភាពច្បាស់លាស់ និងគ្រប់ជ្រុងជ្រោយ មុននឹងដាក់ជូនរាជរដ្ឋាភិបាលពិនិត្យ និងអនុម័ត។កិច្ចប្រជុំនេះបានធ្វើឡើងស្របពេលនឹងការចាប់ផ្តើមធ្វើសកម្មភាពរបស់អាជ្ញាធរនៅតាមក្រសួង-ស្ថាប័ន និងបណ្តាខេត្តពាក់ព័ន្ធនឹងគម្រោងព្រែកជីកហ្វូណន តេជោ ដើម្បីស្វែងរកដំណោះស្រាយផលប៉ះពាល់ផ្សេងៗចំពោះប្រជាពលរដ្ឋ។ ជាក់ស្តែងកាលពីថ្ងៃទី១០ ខែកុម្ភៈ កន្លងមក ថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ ក្រសួងសាធារណការនិងដឹកជញ្ជូន ក្រសួងរៀបចំដែនដី នគរូបនីយកម្មនិងសំណង់ ក្រសួងធនធានទឹក និងអាជ្ញាធរខេត្តកណ្តាល បានរៀបចំវេទិកាមួយដើម្បីពិភាក្សាគ្នាត្រៀមចុះជួបផ្ទាល់ជាមួយអាជ្ញាធរមូលដ្ឋាន និងប្រជាពលរដ្ឋក្នុងន័យពិនិត្យ និងដោះស្រាយផលប៉ះពាល់ផ្សេងៗពីគម្រោងសាងសង់ព្រែកជីកហ្វូណន តេជោ។ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានប្រាប់ភ្នំពេញប៉ុស្តិ៍ក្នុងថ្ងៃទី១៣ ខែកុម្ភៈ ថា ការបង្កើតឱ្យមាន«ក្របខណ្ឌនៃការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា»គឺជារឿងល្អសម្រាប់វិស័យដឹកជញ្ជូនតាមផ្លូវទឹករបស់កម្ពុជា។ លោកបានថ្លែង៖«ខ្ញុំយល់ឃើញថា វាជាការល្អសម្រាប់កម្ពុជាដើម្បីបើកការដឹកជញ្ជូនតាមផ្លូវទឹកឱ្យបានច្រើនជាងនេះ ពីព្រោះថានៅពេលបច្ចុប្បន្ន យើងមើលឃើញហើយថាប្រទេសជិតខាងកម្ពុជា គឺមានការដឹកជញ្ជូនជាហូរហែតាមផ្លូវទឹកច្រើនជាងប្រទេសកម្ពុជា។ សម្រាប់កម្ពុជាវិញ ការប្រើប្រាស់ផ្លូវទឹកនៅមានកម្រិតតិចតួចនៅឡើយ ដូច្នេះប្រទេសកម្ពុជាគួរតែបង្វែរការដឹកជញ្ជូនតាមផ្លូវថ្នល់ពីបណ្តាខេត្តនានាឱ្យបានច្រើន។ ការដឹកជញ្ជូនតាមផ្លូវទឹក ជួយកាត់បន្ថយថ្លៃដឹកជញ្ជូន ក៏ដូចជាកាត់បន្ថយគ្រោះថា្នក់ផ្សេងៗ ហើយក៏ជួយថែរក្សាផ្លូវថ្នល់បានល្អប្រសើរដែរ ដូច្នេះនេះគឺជាវឌ្ឍនភាពមួយរបស់កម្ពុជាដែលអនាគតទៅនឹងប្រើប្រាស់ផ្លូវទឹកឱ្យបានច្រើនជាងនេះ»។ លោកបានបន្ថែមថា៖«ប្រាកដណាស់ បន្ទាប់ពីប្រើប្រាស់ផ្លូវទឹកបានច្រើនជាហូរហែ នាពេលអនាគតគឺព្រែកជីកហ្វូណនតេជោ ដែលជាតម្លាយផ្លូវមួយសម្រាប់នាវាចរណ៍ដឹកទំនិញទៅកាន់កំពង់ផែសមុទ្រ។ នេះជាម្យោបាយដឹកជញ្ជូនមួយដ៏ល្អប្រសើរដែលអាចផ្តល់ភាពងាយស្រួលដល់អ្នកវិនិយោគមានបំណងក្នុងការមកវិនិយោគនៅកម្ពុជា»។ អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានយល់ថា «ក្របខណ្ឌនៃការអភិវឌ្ឍ និងគ្រប់គ្រងអាជីវកម្មកំពង់ផែទន្លេនៅកម្ពុជា» គឺផ្តល់ផលប្រយោជន៍យ៉ាងធំធេងដល់វិស័យសេដ្ឋកិច្ច និងសង្គមកម្ពុជា។ ការដឹកជញ្ជូនអ្នកទេសចរពីទីក្រុងភ្នំពេញទៅកាន់បណ្តាខេត្តនានា និងការតភ្ជាប់ផ្លូវទឹកដ៏សំខាន់សម្រាប់ដឹកជញ្ជូនទំនិញពីកំពង់ផែទឹកសាប ទៅកាន់កំពង់ផែសមុទ្រ។ លោកបានថ្លែងថា៖«នេះគឺជាកិច្ចការមួយដ៏ល្អដែលមានប្រយោជន៍ដល់វិស័យសេដ្ឋកិច្ច និងសង្គមរបស់កម្ពុជា។ សំខាន់គឺសម្រាប់ពង្រីកការដឹកជញ្ជូនអ្នកទេសចរនៅទីក្រុងភ្នំពេញឱ្យកាន់តែប្រសើរ ដោយសារទីក្រុងភ្នំពេញមានសក្តានុពលទន្លេចតុមុខ និងទន្លេសាប ដែលអាចបង្កលក្ខណៈឱ្យមានសកម្មភាពទេសចរណ៍ ក៏ដូចជាសកម្មភាពដំណើរកម្សាន្តវិលល្ងាចនៅតាមដងទន្លេបានច្រើនផងដែរ ដូច្នេះយើងត្រូវយកចិត្តទុកដាក់ឱ្យខ្លាំងក្លាក្នុងកសាងកំពង់ផែដើម្បីបម្រើឱ្យទាំងទេសចរក្នុងស្រុក និងបរទេស»។ លោកបន្ថែមទៀតថា៖«ប្រសិនបើសម្រាប់រយៈពេលវែង នៅពេលព្រែកជីកហ្វូណនតេជោ សាងសង់សម្រេចហើយគឺកាន់តែបង្កើនវិសាលភាពនៃការដឹកជញ្ជូនតាមផ្លូវទឹកកាន់ប្រសើរ អ៊ីចឹងការពង្រីកវិសាលភាពនៃការដឹកជញ្ជូនតាមដងទន្លេកាន់តែមានលក្ខណៈល្អ ដោយតម្រូវឱ្យមានការវិនិយោគអាជីវកម្មកំពង់ផែទន្លេបានមួយផ្នែកថែមទៀត។ កិច្ចការនេះនឹងជួយឱ្យរដ្ឋទទួលបានចំណូល និងប្រជាពលរដ្ឋទទួលបានការងារធ្វើតាមរយៈការបោះទុនវិនិយោគកំពង់ផែទន្លេ»។ គម្រោងព្រែកជីកហ្វូណនតេជោ នឹងត្រូវសាងសង់ស្ទើទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបានបន្សល់ទុកតាំងពីសម័យហ្វូណន ក្នុងនោះផ្លូវទឹកធម្មជាតិដែលមានស្រាប់មានប្រវែង ១៣៥ គីឡូម៉ែត្រ និងផ្លូវទឹកជីកថ្មីប្រវែង ៧ គីឡូម៉ែត្រ ព្រមទាំងផ្លូវទឹកជីកតម្រង់ប្រវែង ៣៨ គីឡូម៉ែត្រ។ គម្រោងនេះនឹងត្រូវប្រើពេលសាងសង់ ៤៨ខែ ដោយគ្រោងបញ្ចប់នៅឆ្នាំ ២០២៨ ដែលប្រើប្រាស់ទុនវិនិយោគសរុបប្រមាណ ១,៧ ពាន់លានដុល្លារ។ នៅពេលគម្រោងព្រែកជីកហ្វូណន តេជោសាងសង់រួចរាល់ គឺគេអាចដឹកជញ្ជូនមនុស្ស/ទំនិញចេញ-ចូលពីកំពង់ផែស្វយ័តភ្នំពេញ(កំពង់ផែទន្លេ) នៅកាន់កំពង់ផែសមុទ្រនៅក្នុងខេត្តព្រះសីហនុ កំពត កែប និងកោះកុង ដោយផ្ទាល់តែម្តង។