ចុះផ្សព្វផ្សាយជាសាធារណ:ជាមួយអាជ្ញាធរមូលដ្ឋានសម្រាប់អនុគម្រោង MPWT-CW-6A នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ខេត្តសៀមរាប៖ នាព្រឹកថ្ងៃសុក្រ ទី៧ ខែកុម្ភៈ ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីកិច្ចប្រជុំនៅសាលាសង្កាត់គោកចក ក្រុងសៀមរាប ខេត្តសៀមរាប ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក ថ្នាក់ដឹកនាំ និងមន្ត្រីនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងក្រុមហ៊ុនសាងសង់ តំណាងក្រុមហ៊ុនទីប្រឹក្សា តំណាងមន្ទីរសាធារណការ និងដឹកជញ្ជូនខេត្តសៀមរាប ក្រុមការងារគម្រោង ចៅសង្កាត់ មេភូមិ ស្មៀន សមាជិកភូមិ ព្រមទាំងមន្ត្រីអាជ្ញាធរមូលដ្ឋានពាក់ព័ន្ធ។ គោលបំណងនៃកិច្ចប្រជុំនេះគឺ ដើម្បីធ្វើការផ្សព្វផ្សាយជាសាធារណ:ជាមួយអាជ្ញាធរមូលដ្ឋានសម្រាប់អនុគម្រោង MPWT-CW-6A នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ដែលបានទទួលហិរញ្ញប្បទានសម្បទានពីធនាគារពិភពលោក និងថវិកាបដិភាគរបស់រាជរដ្ឋាភិបាលកម្ពុជា។ គម្រោងនេះប្រើប្រាស់ពេលវេលាក្នុងការសាងសង់ចំនួន១ឆ្នាំ(២០២៥) សម្រាប់ការងារសាងសង់បណ្តាញលូខ្នែង ខ្នែងរង មានប្រវែងសរុប ១៧ ៥៧៧ម៉ែត្រ តំណភ្ជាប់តាមផ្ទះចំនួន ១២០៧តំណ និងការងារសាងសង់ស្ថានីយបូមទឹកចំនួន២។ ក្នុងឱកាសនោះផងដែរ ឯកឧត្តមគណៈអធិបតី ក៏បានមានប្រសាសន៍ ពន្យល់ណែនាំដល់អាជ្ញាធរមូលដ្ឋានឱ្យបានយល់ជ្រាបច្បាស់ និងងាយស្រួលក្នុងការពន្យល់ណែនាំដល់ប្រជាពលរដ្ឋឱ្យបានយល់ដឹងពីអត្ថប្រយោជន៍នៃការតភ្ជាប់បណ្តាញលូរដ្ឋ តាមបទដ្ឋានបច្ចេកទេសត្រឹមត្រូវ ដែលអាចជួយឱ្យការរស់នៅមានអនាម័យ ប្រកបដោយសុខុមាលភាព៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube