[Sabay] - ភាគីកម្ពុជាស្នើឲ្យភាគីកូរ៉េជួយពន្លឿនការបង្កើតវិទ្យាស្ថានបច្ចេកទេសមួយនៅកម្ពុជា
2018-09-19
ទៅកាន់ទំព័រចុះផ្សាយក្នុង Sabay
ក្រសួងសាធារណការ និងដឹកជញ្ជូន ស្នើឲ្យវិទ្យាស្ថានបច្ចេកវិទ្យាមួយរបស់ប្រទេសកូរ៉េខាងត្បូងពន្លឿនការស្ថាបនាវិទ្យាស្ថាបច្ចេកវិទ្យាសំណង់កម្ពុជា-កូរ៉េ ដើម្បីការធានាឲ្យបាននូវស្ដង់ដារគុណភាពនៃសំណង់ផ្លូវថ្នល់នៅកម្ពុជា។
កាលពីម្សិលមិញឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ បានធ្វើទស្សនកិច្ចនៅវិទ្យាស្ថានបច្ចេកវិទ្យាសំណង់កូរ៉េ នៅទីក្រុងសេអ៊ូល ប្រទេសកូរ៉េ។ នេះបើតាមការផ្សាយនៅលើទំព័រហ្វេសប៊ុករបស់ក្រសួង។
ក្នុងដំណើរទស្សនកិច្ចនេះភាគី វិទ្យាស្ថានបច្ចេកវិទ្យាសំណង់កូរ៉េបានបង្ហាញភាគីកម្ពុជានូវសេចក្តីព្រាងផែនការគាំទ្រការបង្កើតវិទ្យាស្ថានបច្ចេកវិទ្យាសំណង់កម្ពុជា-កូរ៉េ។ បើតាមប្រភពខាលើឯកឧត្តម ស៊ុន ចាន់ថុល ជំរុញឲ្យវិទ្យាស្ថានមច្ចេកវិទ្យាសំណងកូរ៉េនេះ ពន្លឿនការបង្កើតវិទ្យាស្ថានបច្ចេកវិទ្យាសំណង់កម្ពុជា-កូរ៉េនេះ ឲ្យបានក្នុងរយៈពេលពីរឆ្នាំខាងមុខ ឬ ខ្លីជាងនេះតាមដែលអាចធ្វើទៅបាន។
ឯកឧត្តម លើកឡើងថា៖ « កម្ពុជាចាំបាច់ត្រូវធ្វើឱ្យប្រសើរឡើងនូវស្តង់ដារនៃការស្ថាបនា ផ្លូវថ្នល់ ដើម្បីកាត់បន្ថយគ្រោះថ្នាក់ចរាចរណ៍ និងរក្សាគុណភាពហេដ្ឋារចនាសម្ព័ន្ធផ្លូវថ្នល់ឱ្យមានភាព រឹងមាំ និងប្រើប្រាស់ជាប់បានយូរ...ជាពិសេស បច្ចេកវិទ្យាជួសជុលផ្លូវថ្នល់មានសារៈសំខាន់ណាស់ ដោយសារតំបន់ភាគខាងត្បូងនៃប្រទេសដូចជា ខេត្តកំពត ខេត្តកែប ក្រុងព្រះសីហនុ និងខេត្តកោះកុង មានភ្លៀងធ្លាក់ជោគជាំនៅរដូវវស្សា»។
គួរបញ្ជាក់ថាវិទ្យាស្ថានមច្ចេកវិទ្យាសំណងកូរ៉េគឺជាវិទ្យាស្ថានរបស់រដ្ឋាភិបាលកូរ៉េ មានជំនាញឯកទេសខាងការស្រាវជ្រាវ និងវិស្វកម្មសំណង់។ វិទ្យាស្ថាននេះ មានបុគ្គលិកជំនាញថ្នាក់បណ្ឌិតជាង ៩០០នាក់ដែលមានជំនាញផ្សេងៗគ្នាទាក់ទងនឹងការសាងសង់៕
