ពិធីចុះហត្ថលេខាលើអនុស្សរណៈ នៃការយោគយល់គ្នារវាង វិទ្យាស្ថានតេជោសែន សាធារណការ និងដឹកជញ្ជូន និងក្រុមហ៊ុន Bok Seng PPSEZ Dry Port ទីស្ដីការក្រសួង៖ នាព្រឹកថ្ងៃទី២៧ ខែមករា ឆ្នាំ២០២៥ ឯកឧត្ដម ឡាវ វ៉ាន់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញចូលរួមជាអធិបតីភាព ក្នុងពិធីចុះហត្ថលេខាលើអនុស្សរណៈ នៃការយោគយល់គ្នារវាង វិទ្យាស្ថានតេជោសែន សាធារណការ និងដឹកជញ្ជូន និងក្រុមហ៊ុន Bok Seng PPSEZ Dry Port ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្ដមនាយក ឯកឧត្តមទីប្រឹក្សាក្រសួង មន្រ្ដីរាជការ នាយកប្រតិបត្តិក្រុមហ៊ុន និងសហការី ក្រុមហ៊ុន Bok Seng PPSEZ Dry Portផងដែរ ។ ពិធីចុះហត្ថលេខាលើអនុស្សរណៈ នៃការយោគយល់គ្នានេះ រៀបចំឡើងក្នុងគោលបំណងដើម្បពង្រីកបន្ថែមនូវកិច្ចសហប្រតិបត្តិការ ក្នុងក្របខណ្ឌអប់រំ បណ្តុះបណ្តាល និងផ្តល់ជំនួយបច្ចេកទេសផ្សេងៗ ក្នុងវិស័យសាធារណការ និងដឹកជញ្ជូន ដែលជាឧត្តមប្រយោជន៍ដល់គ្នាទៅវិញទៅមក និងបន្ដពង្រីកកិច្ចសហការជាមួយគ្នាក្នុងការរៀបចំបាឋកថាចែករំលែកចំណេះដឹងលើកម្មវិធីសិក្សារបស់វិទ្យាស្ថាន និងបច្ចេកវិទ្យាថ្មីៗក្នុងវិស័យសាធារណការ និងដឹកជញ្ជូន ដើម្បីអាចផ្ដល់ឱកាសដល់និស្សិតវិទ្យាស្ថានធ្វើទស្សនកិច្ចសិក្សា និងកម្មសិក្សាបន្ត នៅទីតាំងក្រុមហ៊ុន។ ថ្លែងនាឱកាសនោះ ឯកឧត្តមនាយកវិទ្យាស្ថាន បានលើកឡើងពីសាវតាសង្ខេប ពីសកម្មភាពកន្លងមករបស់វិទ្យាស្ថាន និងក្រុមហ៊ុន Bok Seng PPSEZ Dry Port បានធ្វើការជាមួយគ្នា តាមរយៈកិច្ចសហប្រតិបត្ដិការ ដោយបានផ្តល់ឱកាសឱ្យមន្រ្តីវិទ្យាស្ថានចុះទស្សនកិច្ចសិក្សា និងនិស្សិតចុះកម្មសិក្សានៅក្រុមហ៊ុន ដែលទាំងនេះហើយទើបនាំឱ្យឈានដល់ការរៀបចំពិធីចុះហត្ថលេខាលើអនុស្សរណៈ នៃការយោគយល់គ្នានេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube