កិច្ចប្រជុំស្តីពីគម្រោងរៀបចំច្រកទ្វារអន្តរជាតិស្ទឹងបត់ ជំហានទី២ គម្រោងលើកកម្រិតផ្លូវជាតិលេខ ៥៧ និងចុះហត្ថលេខាលើកំណត់ហេតុស្តីពីការផ្តល់ជំនួយបច្ចេកទេសលើការសិក្សាគម្រោងរៀបចំច្រកទ្វារអន្តរជាតិស្ទឹងបត់ ជំហានទី២ ទីស្ដីការក្រសួង៖ នាថ្ងៃពុធ ទី២២ ខែមករា ឆ្នាំ២០២៥ ឯកឧត្ដម សុខុម ភគវន្តមុនី រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាសហប្រធានដឹកនាំកិច្ចប្រជុំទ្វេភាគី ជាមួយនឹង ឯកឧត្តម Perames Vudthitornetiraks ប្រធាន NEDA ស្តីពីគម្រោងរៀបចំច្រកទ្វារអន្តរជាតិស្ទឹងបត់ ជំហានទី២ គម្រោងលើកកម្រិតផ្លូវជាតិលេខ៥៧ និងបានចុះហត្ថលេខាលើកំណត់ហេតុស្តីពីការផ្តល់ជំនួយបច្ចេកទេសលើការសិក្សាគម្រោងរៀបចំច្រកទ្វារអន្តរជាតិស្ទឹងបត់ ជំហានទី២ ក្រោមហិរញ្ញប្បទានពីស្ថាប័ន NEDA នៃព្រះរាជាណាចក្រថៃ ដោយមានការអញ្ជើញចូលរួមពីថ្នាក់ដឹកនាំក្រសួង និងក្រុមការងារបច្ចេកទេសពាក់ព័ន្ធនៃក្រសួងសាធារណការ និងដឹកជញ្ជូន និងស្ថាប័ន NEDA ជាច្រើនរូប។ ឯកឧត្ដមរដ្ឋលេខាធិការ បានថ្លែងអំណរគុណចំពោះស្ថាប័ន NEDA ដែលបានផ្តល់ឥណទានសម្រាប់គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ ៥ ជំហានទី១ ដែលបានបញ្ចប់ការសាងសង់ទាំងស្រុង នៅក្នុងខែសីហា ឆ្នាំ២០២៣ កន្លងមក និងការផ្តល់ជំនួយបច្ចេកទេសម្រាប់ការសិក្សាគម្រោងរៀបចំច្រកទ្វារអន្តរជាតិស្ទឹងបត់ ជំហានទី២។ ឆ្លៀតក្នុងឱកាសនោះដែរ ឯកឧត្តម Perames Vudthitornetiraks ក៏បានថ្លែងអំណរគុណដល់ថ្នាក់ដឹកនាំគម្រោងដែលខិតខំប្រឹងប្រែងជួយធ្វើឱ្យគម្រោងបានបញ្ចប់ទៅដោយរលូនប្រកបដោយគុណភាព និងសោភណ្ឌភាព។ ស្ថាប័ន NEDA បានបញ្ជាក់ថា នឹងបញ្ជូនក្រុមការងារបច្ចេកទេសចុះសិក្សាលើគម្រោងលើកកម្រិតផ្លូវជាតិលេខ ៥៧ នាពេលឆាប់ៗខាងនេះ។ ក្រោយពីកិច្ចប្រជុំបានបញ្ចប់ ឯកឧត្ដមរដ្ឋលេខាធិការ និង ឯកឧត្តម Perames Vudthitornetiraks បានចុះហត្ថលេខាលើកំណត់ហេតុស្តីពីការផ្តល់ជំនួយបច្ចេកទេសលើការសិក្សាគម្រោងរៀបចំច្រកទ្វារអន្តរជាតិស្ទឹងបត់ ជំហានទី២ផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube