សុខុមាលភាពរបស់បងប្អូនប្រជាពលរដ្ឋ គឺជាអាទិភាពដែលតែងតែទទួលបានការយកចិត្តទុកដាក់ មណ្ឌលគិរី៖ នារសៀលថ្ងៃចន្ទ ទី៦ ខែមករា ឆ្នាំ២០២៥ ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អមដោយ ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី និងក្រុមការងារ បានអញ្ជើញចុះសួរសុខទុក្ខ និងនាំយកអំណោយរបស់ខេត្ត និងក្រុមការងារចែកជូនដល់ស្ត្រីមានផ្ទៃពោះត្រៀមសម្រាល ព្រមទាំងស្ត្រីទើបសម្រាលកូនរួច សរុបចំនួន ១៣នាក់ ដែលស្ថិតនៅមន្ទីរពេទ្យបង្អែក ខេត្តមណ្ឌលគិរី។ សម្ភារៈសម្រាប់ផ្តល់ជូនម្នាក់ៗ រួមមាន សម្ភារសម្រាប់ទារក ១ឈុត (ពួក, ខ្នើយកើយ, ខ្នើយឱប, សាប៊ូ, ម្សៅ) សម្ភារសម្រាប់ស្ត្រីជាម្តាយ ១ឈុត (មុង, ភួយ, ក្រមា, សារុង) ទឹកដោះគោឆៅ ១យួរ មី ១កេស អង្ករ ២០គ.ក រួមទាំងទឹកត្រី ទឹកស៊ីអ៊ីវ ត្រីខ និងថវិកាមួយចំនួន៕