ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អញ្ជើញជាអធិបតីកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅអនុវត្តការងារបន្តឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មណ្ឌលគិរី៖ នាព្រឹកថ្ងៃសុក្រ ទី២០ ខែធ្នូ ឆ្នាំ២០២៤ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៤ និងលើកទិសដៅអនុវត្តការងារបន្តឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដែលបានប្រព្រឹត្តទៅនៅសាលាខេត្តមណ្ឌលគិរី ដោយមានវត្តមានចូលរួមពី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម ថង សាវុន អភិបាលនៃគណៈអភិបាលខេត្ត និងជាអនុប្រធានអចិន្រ្តៃយ៍ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ឯកឧត្តមអនុប្រធានក្រុមការងារ និង ឯកឧត្តម លោកជំទាវ លោក លោកស្រី ដែលជាសមាជិក សមាជិកា នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងមន្ត្រីពាក់ព័ន្ធពីគ្រប់អង្គភាពជុំវិញខេត្តជាច្រើនរូបផ្សេងទៀត។ លទ្ធផលការងារប្រចាំឆ្នាំ២០២៤ ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចូលរួមគាំទ្រ និងអនុវត្តកម្មវិធីគោលនយោបាយអាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាល នីតិកាលទី៧ នៃរដ្ឋសភា រួមទាំងការគាំទ្រ និងជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាព កំណែទម្រង់វិមជ្ឈការ និងវិសហមជ្ឈការ ការផ្តល់សេវាជូនប្រជាពលរដ្ឋតាមយន្តការច្រកចេញចូលតែមួយ។ ក្នុងនោះ កម្មវិធីគោលនយោបាយអាទិភាពទាំង៦ ដែលក្រុមការងាររាជរដ្ឋាភិបាលចុះមូលដ្ឋានបានចូលរួមគាំទ្រ និងចូលរួមអនុវត្ត រួមមាន៖ (១). ការពង្រីកសេវាថែទាំសុខភាព (២).ការបណ្ដុះបណ្ដាលជំនាញវិជ្ជាជីវៈ និងបច្ចេកទេសជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន១,៥លាននាក់ (៣).ការធ្វើស្ថាបនូបនីយកម្មវិធីជាតិជំនួយសង្គមសម្រាប់គ្រួសារក្រីក្រ ក្រុមជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យ (៤).ការអនុវត្តយុទ្ធសាស្រ្តស្តីពីការអភិវឌ្ឍសេដ្ឋកិច្ចក្រៅប្រព័ន្ធ (៥).ការរៀបចំយន្តការសម្របសម្រួល និងកម្មវិធីហិរញ្ញប្បទាន និង (៦).ការដាក់ពង្រាយមន្ត្រីបច្ចេកទេសកសិកម្មក្នុងគ្រប់ឃុំ សង្កាត់។ ដោយឡែក វិធានការគន្លឹះទាំង៥ ដែលក្រុមការងាររាជរដ្ឋាភិបាលចុះមូលដ្ឋានបានចូលរួមចំណែកយ៉ាងសំខាន់ក្នុងការអនុវត្ត រួមមាន៖ (១).ការពង្រឹងសមត្ថភាពរដ្ឋបាលសាធារណៈ (២).ការលើកកម្ពស់គុណភាពអប់រំ (៣).ការលើកកម្ពស់គុណភាពសេវាសុខាភិបាល (៤).ការពង្រឹងការអនុវត្តគោលនយោបាយ ភូមិ-ឃុំ សង្កាត់មានសុវត្ថិភាព និង ៥.ការពង្រឹង និងលើកកម្ពស់គុណភាព និងប្រសិទ្ធភាពប្រព័ន្ធយុត្តិធម៌។ បន្ថែមពីនេះ ក្នុងរយៈពេល១២ខែកន្លងមកនេះ ក្រុមការងារសម្រេចបានសមិទ្ធិផលសំខាន់ៗជាច្រើនដូចជា៖ (១).ការពង្រឹងរចនាសម្ព័ន្ធក្រុមការងារៈ បានបញ្ចប់ការរៀបចំក្រុមការងាររាជរដ្ឋាភិបាលចុះមូលដ្ឋានថ្នាក់ក្រុង ស្រុក និងឃុំ សង្កាត់ និង ក្រុមលេខាធិការដ្ឋានថ្នាក់ខេត្ត ក្រុង ស្រុក (២).ការចុះធ្វើវេទិកាសាធារណៈ បានចំនួន ៣៨លើក មានប្រជាពលរដ្ឋចូលរួមសរុប១ ៦៣៥នាក់ ក្នុងនោះនៅស្រុកកែវសីមា ១០លើក ស្រុកអូររាំង ៤លើក ក្រុងសែនមនោរម្យ ១០លើក ស្រុកកោះញែក ៦លើក និង ស្រុកពេជ្រាដា ៨លើក ដោយទទួលបានការលើកឡើងពីប្រជាពលរដ្ឋមានចំនួន ៣៥៨ករណី ដែលក្នុងនោះបានដោះស្រាយ ១៤៤ករណី(ស្មើនឹង៤០,២២%) បាននឹងកំពុងដោះស្រាយ ១៩១ករណី(ស្មើនឹង ៥៣,៣៥%) និង មិនទាន់ដោះស្រាយ ២៣ករណី(ស្មើនឹង ៦,៤២%) (៣).ការកំណត់វិស័យអាទិភាពទាំង៥: បានធ្វើបទបង្ហាញចែករំលែកការអនុវត្តការងារ និងបានបញ្ចប់ការរៀបចំខិត្តបណ្ណ រួមមាន៖ វិស័យទេសចរណ៍ កសិកម្ម បរិស្ថាន ធនធានទឹក និង វិស័យរ៉ែ និងថាមពល (៤). ការលើកឡើងច្រើនជាងគេពីពលរដ្ឋលើវិស័យ៥: ក្នុងចំណោមវិស័យទាំង២១ មានវិស័យចំនួន៥ ដែលមានប្រជាពលរដ្ឋបានលើកឡើងច្រើនជាងគេក្នុងវេទិកាសាធារណៈ គឺ វិស័យដីធ្លី(៦៧ករណី) អភិវឌ្ឍន៍ជនបទ(៥៩ករណី) បរិស្ថាន(៥១ករណី) អគ្គិសនី(២៤ករណី) និង ទឹកស្អាត និងអនាម័យជនបទ(២៤ករណី) (៥). ការប្រជុំថ្នាក់ដឹកនាំក្រុមការងារនៅភ្នំពេញៈ ជាយន្តការបន្ថែមពីលើការប្រជុំក្រុមការងារនៅមូលដ្ឋានខេត្តមណ្ឌលគិរី ថ្នាក់ដឹកនាំក្រុមការងារ ជាមួយនឹងក្រុមការងារតំណាងតាមក្រសួង ស្ថាប័ន និងមន្ទីរសម្រាប់វិស័យអាទិភាព និង វិស័យដែលមានការលើកឡើងបញ្ហាប្រឈមច្រើននៅវេទិកាសាធារណៈ បានប្រជុំចំនួន ៣ដង នៅភ្នំពេញ ដែលជាយន្តការបន្ថែមក្នុងការជួយតម្រង់ទិស ចូលរួមដោះស្រាយ និងពិនិត្យលទ្ធភាពបន្ថែមក្នុងការគាំទ្រដល់ការអនុវត្តការងាររបស់ក្រុមការងារឱ្យកាន់តែមានប្រសិទ្ធិភាព និង (៦). ការផ្សព្វផ្សាយតាមបណ្តាញសង្គមៈ បានរៀបចំក្រុមការងារផ្សព្វផ្សាយរវាងថ្នាក់ជាតិ និងថ្នាក់ខេត្ត ក្រុង ស្រុក និងសេចក្តីណែនាំ ស្តីពីយន្តការផ្សព្វផ្សាយតាមបណ្តាញសង្គម ព្រមទាំងបានផ្សព្វផ្សាយមាតិកាជាប្រចាំក្នុងផេក និងគ្រុបតេឡេក្រាមរាល់សកម្មភាពការងាររបស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី។ ឆ្លៀតក្នុងឱកាសនេះ ឯកឧត្តមប្រធាន បានសម្តែងនូវការអបអរសាទរលើសមិទ្ធផលទាំងអស់ និងថ្លែងអំណរគុណចំពោះក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ និងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ នៅខេត្តមណ្ឌលគិរី បានប្រឹងប្រែងរួមគ្នាក្នុងការបំពេញភារកិច្ចទៅតាមតួនាទីរៀងៗខ្លួន ដែលនាំឱ្យក្រុមការងាររាជរដ្ឋាភិបាលចុះមូលដ្ឋានរបស់ខេត្ត ទទួលបានលទ្ធផលជាច្រើនកន្លងមក។ ជាពិសេសលើសកម្មភាពរបស់ក្រុមការងាររាជរដ្ឋាភិបាលចុះមូលដ្ឋានទាំងអស់ ដែលបានចុះធ្វើវេទិកាសាធារណៈថ្នាក់ជាតិ តាមលំដាប់ថ្នាក់នីមួយៗ ទទួលបានលទ្ធផលល្អប្រសើរតាមផែនការគ្រោងទុក ព្រមទាំងក្តាប់បាននូវបញ្ហាប្រឈម តម្រូវការ និងចម្ងល់នានារបស់ប្រជាពលរដ្ឋ។ ទន្ទឹមនឹងនេះ ឯកឧត្តមប្រធាន បានជំរុញឱ្យក្រុមការងាររាជរដ្ឋាភិបាលចុះមូលដ្ឋានទាំងអស់ បន្តយកចិត្តទុកដាក់អនុវត្តតួនាទី ភារកិច្ច សេចក្តីណែនាំរបស់រាជរដ្ឋាភិបាលដែលបានដាក់ចេញកន្លងមក និងផែនការសកម្មភាពឱ្យទទួលបានប្រសិទ្ធភាព ព្រមទាំងដាក់ទិសដៅបន្ត មួយចំនួនដូចជា៖ (១).បន្តចុះធ្វើវេទិកាសាធារណៈថ្នាក់ជាតិឱ្យគ្រប់ឃុំ សង្កាត់នៅឆ្នាំ២០២៥ (២).បញ្ហាប្រឈម សំណើ និងសំណូមពរចុះវេទិកាសាធារណៈ (៣).ការចុះជួបប្រជាពលរដ្ឋតាមខ្នងផ្ទះ (៤).ការបណ្ដុះបណ្ដាលជំនាញវិជ្ជាជីវៈ និងបច្ចេកទេស១,៥លាននាក់ (៥).កាស្នើសុំផ្តល់អត្តសញ្ញាណប័ណ្ណសញ្ជាតិខ្មែរ (៦).ឯកសារជំនួយស្មារតីចុះធ្វើវេទិកាសាធារណៈ (៧).ការសិក្សាទីតាំងទេសចរណ៍តាមរដូវកាល (៨).ការសិក្សាលទ្ធភាពទំនប់ទឹក ឬអាងផ្ទុកទឹក (៩).ផែនការចែកកូនឈើហូបផ្លែ (១០).ការផ្តល់បណ្ណ ប.ស.ស (១១).ការសិក្សាលទ្ធភាពអភិវឌ្ឍន៍ខេត្ត៕