កិច្ចប្រជុំ ស្ដីពីការរៀបចំ និងដំណើរការកិច្ចប្រតិបត្តិការច្រកទ្វារអន្តរជាតិ ស្ទឹងបត់-បានណងអៀន ទីស្តីការក្រសួង ៖ នាថ្ងៃព្រហស្បតិ៍ ទី៧ ខែវិច្ឆិកា ឆ្នាំ២០២៤ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ (NTTCC) បានអញ្ជើញជាអធិបតីក្នុងកិច្ចប្រជុំ ស្ដីពីការរៀបចំ និងដំណើរការកិច្ចប្រតិបត្តិការច្រកទ្វារអន្តរជាតិ ស្ទឹងបត់-បានណងអៀន ដោយមានការអញ្ជើញចូលរួមពី ឯកឧត្ដមរដ្ឋលេខាធិការ ឯកឧត្ដមអនុរដ្ឋលេខាធិការ ឯកឧត្ដមអគ្គនាយក អគ្គនាយករង តំណាងអភិបាលខេត្ត-ក្រុង និងមន្ទីរសាធារណការ និងដឹកជញ្ជូនខេត្តបន្ទាយមានជ័យ លោក លោកស្រី ដែលជាតំណាងអន្តរក្រសួង ដែលជាសមាជិកគណៈកម្មាធិការ និងភាគីពាក់ព័ន្ធជាច្រើនរូបផងដែរ។ កិច្ចប្រជុំនេះត្រូវបានរៀបចំឡើង ដើម្បីពិនិត្យលទ្ធភាពក្នុងការត្រៀមបើកច្រកទ្វារអន្តរជាតិ ស្ទឹងបត់-បានណងអៀន ជាផ្លូវការ ជាពិសេសការរៀបចំលិខិតបទដ្ឋានគតិយុត្តនានា ដើម្បីធ្វើយ៉ាងណាឱ្យមានសង្គតិភាពជាមួយនឹងច្បាប់ជាតិ និងអន្តរជាតិ។ ច្រកទ្វារអន្តរជាតិ ស្ទឹងបត់-បានណងអៀន ជាច្រកទ្វារដ៏សំខាន់មួយក្នុងការតភ្ជាប់ផ្លូវដឹកជញ្ជូនរវាងប្រទេសទាំងពីរ ជំរុញកំណើនសេដ្ឋកិច្ច ពាណិជ្ជកម្ម ទេសចរណ៍ និងទំនាក់ទំនងរវាងប្រជាជន និងប្រជាជន ព្រមទាំងពង្រឹងការអភិវឌ្ឍនៅតំបន់ព្រំដែនប្រកបដោយចីរភាព និងបរិយាបន្ន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube