ជាក់ស្ដែងផ្លូវបេតុងកំពុងរងការខូចខាតដោយលានសរសៃដែករញ៉េរញ៉ៃចេញមកលើផ្លូវនេះ ស្ថិតក្នុងភូមិកាកាប សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ លោក អួន បញ្ញា ជាប្រជាពលរដ្ឋឧស្សាហ៍ជិះឆ្លងកាត់ បានលើកឡើងថា ចំពោះបញ្ហាផ្លូវនេះ កន្លងទៅអាជ្ញាធរបានចាក់បេតុងចំនួន ០១ ខ្សែ សម្រាប់ឲ្យប្រជាពលរដ្ឋប្រើប្រាស់ម្ដងដែរ ប៉ុន្តែយូរឆ្នាំមកហើយ។លោកបន្តថា សភាពខូចខាតផ្លូវនេះ គឺមិនអាចចាក់គ្រួស ឬ ខ្សាច់ ដើម្បីបំពេញជង្ហុកបាននោះឡើយ ដោយសារតែជង្ហុកនីមួយៗ ធំខ្លាំងណាស់ ទោះបីជាចង់ប្រមូលលុយពលរដ្ឋរស់នៅតំបន់នោះយកមកទិញខ្សាច់ ឬ ថ្មគ្រួស ក៏ត្រូវចំណាយថវិកាច្រើននោះដែរ។ ជាពិសេសនៅពេលយប់ និងពេលមានភ្លៀងធ្លាក់ម្ដងៗ ជន់លិច មិនអាចមើលឃើញពីស្ថានភាពផ្លូវដែលកំពុងតែរងការខូចខាត ជាហេតុនាំឲ្យគ្រោះថ្នាក់ជាយថាហេតុ។ ពាក់ព័ន្ធបញ្ហានេះ លោក ប៉ាង លីដា អភិបាលរងខណ្ឌពោធិ៍សែនជ័យ បានប្រាប់ឲ្យកម្ពុជាថ្មីដឹងថា លោកនឹងចាត់មន្ត្រីជំនាញចុះពិនិត្យជាបន្ទាន់។ដោយឡែក លោក គ្រី ដារ៉ា ដែលជាប្រជាពលរដ្ឋ ក៏បានស្នើសុំអាជ្ញាធរសូមជួយពន្លឿនក្នុងការជួសជុលផ្លូវបេតុងកំពុងរងខូចខាតទាំងស្រុងនេះផង ព្រោះថាចំណុចផ្លូវនេះ កំពុងបង្កការលំបាកទៅដល់ប្រជាពលរដ្ឋកំពុងរស់នៅតំបន់នោះ ជាពិសេសពេលធ្វើដំណើរយប់ឡើង ងាយនឹងអាចគ្រោះថ្នាក់ក៏ថាបាន៕