កិច្ចប្រជុំស្តីពីការពិនិត្យពិភាក្សា បែបបទ និងរបៀបរបបការងារគណបក្សនៅមូលដ្ឋាន ក្រោមអធិបតីភាព ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកស្អាង ស្រុកស្អាង ៖ នាថ្ងៃសៅរ៍ ៥រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ២៤ ខែ សីហា ឆ្នាំ២០២៤ ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកស្អាង ដឹកនាំកិច្ចប្រជុំស្តីពីការពិនិត្យពិភាក្សា បែបបទ និងរបៀបរបបការងារគណបក្សនៅមូលដ្ឋាន ដោយមានការអញ្ជើញចូលរួមពី ឯកឧត្តម លោកជំទាវ ឧកញ៉ា លោក លោកស្រីអនុប្រធានក្រុមការងារគណបក្សចុះមូលដ្ឋានស្រុកស្អាង ចំនួន ៥៤ រូប គណៈអចិន្ត្រៃយ៍គណបក្សស្រុក ១៦ រូប និងប្រធានគណៈកម្មធិការគណបក្សឃុំ ១២ រូប សរុបទាំងអស់ ៨២ រូប ដែលកម្មវិធីនេះប្រព្រឹត្តទៅសាលប្រជុំគណបក្សស្រុកស្អាង ខេត្តកណ្តាល។ កិច្ចប្រជុំធ្វើឡើងក្នុងគោលបំណង ចំបង ៣គឺ ៖ (១) ការឧបត្ថម្ភគាំពារដល់គ្រួសារបក្សមានទុក្ខលំបាក ដូចជាមរណភាព សម្រាលកូន និងការទ្រទ្រង់ទីស្នាក់ការគណបក្សស្រុក (២) ការងារសេវារដ្ឋបាល មានដូចជា សំបុត្រកំណើត សំបុត្រអាពាហ៍ពិពាហ៍ និងលិខិតមរណភាព ជាដើម (៣) ការងារផ្សេងៗ។ មានប្រសាសន៍សំណេះសំណាល និងផ្តាំផ្ញើនាឱកាសនោះ ឯកឧត្តមប្រធាន បានលើកឡើងពីស្ថានភាពសង្គមបច្ចុប្បន្ន រួមមានព្រឹត្តិការណ៍ប្រវត្តិសាស្ត្រ ការបើកការដ្ឋានព្រែកជីកហ្វូណនតេជោ កាលពីថ្ងៃទី ៥ ខែសីហា ឆ្នាំ២០២៤ និងករណីពាក់ព័ន្ធកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) ជាដើម។ ជាមួយនេះ ឯកឧត្តមប្រធាន ក៏បានក្រើនរំលឹកទៅកាន់សមាជិកក្នុងអង្គប្រជុំ ត្រូវធ្វើយ៉ាងណាយកចិត្តទុកដាក់តាមដានស្ថានការណ៍សង្គមគ្រប់ពេលវេលា ត្រូវបញ្រ្ជាបរាល់សកម្មភាពដែលជាសមិទ្ធផលរបស់ក្រុមការងារបានខិតខំប្រឹងប្រែងអភិវឌ្ឍនាពេលកន្លងមកនៅទូទាំងប្រទេស និយាយជារួម និងនិយាយដោយឡែកចំពោះមូលដ្ឋាននីមួយៗដែលខ្លួនរស់នៅ ទៅដល់សមាជិកសមាជិកាក្នុងភូមិ-ឃុំ ទទួលបានព័ត៌មានកាន់តែទូលំទូលាយ ជាពិសេសប្រជាពលរដ្ឋបានមើលឃើញពីការខិតខំយកចិត្តទុកដាក់របស់បក្ស៕