(ព័ត៌មានជាតិ)៖ កាលពីព្រឹកថ្ងៃទី០៥ សីហា ឆ្នាំ២០២៤នេះ គឺព្រឹតិ្តការណ៍ប្រវត្តិសាស្ត្រ សម្រាប់កម្ពុជា ដែលបានបើកការដ្ឋានសាងសង់ ព្រែកជីកហ្វូណនតេជោ ដោយមានការចូលរួមនៅទូទាំងប្រទេស ពីក្រសួង ស្ថាប័ន សាលារៀន ក្រុមហ៊ុនឯកជននានា បាននាំគ្នាវាយជួង ទូងស្គង សម្ដែងការអបអរសាទរ និងសប្បាយរីករាយឥតឧបមា។ គម្រោង “ព្រែកជីកហ្វូណនតេជោ” គឺជាគម្រោងមួយដ៏ធំមហិមា និង មានលក្ខណៈជាយុទ្ធសាស្រ្តពិសេស ដែលសាងសង់ឡើងក្នុងគោលដៅលើក កម្ពស់សកម្មភាពដឹកជញ្ជូនទំនិញ កសិផល និងភ្ញៀវទេសចរ គ្រប់គ្រងទឹកជំនន់ និង គ្រោះរាំងស្ងួត រួមទាំងពង្រឹងឯករាជ្យភាព អធិបតេយ្យភាព និងពង្រីកឧត្តមភាព នៃការដឹកជញ្ជូនតាមផ្លូវទឹករបស់កម្ពុជាផ្ទាល់។ ទាំងនេះជាចំណេះដឹងខ្លីៗ អំពីព្រែកជីកហ្វូណនតេជោ ដែលសាធារណជនគ្រប់ និងយុវជនជំនាន់ក្រោយៗត្រូវដឹង៖ ការសាងសង់ព្រែកជីកហ្វូណនតេជោ គ្រោងចំណាយថវិកាសរុបប្រមាណ ១៧០០ លានដុល្លារអាមេរិក ដែលជាប្រភេទគម្រោងវិនិយោគ BOT ( Build Operate Tranfer) ដោយឆ្លងកាត់ខេត្តចំនួន៤ រួមមាន ខេត្តកណ្ដាល តាកែវ កំពត កែប និងមានចំនួនប្រជាជនតាមការប៉ានស្មានសរុបប្រមាណ ១លាន ៦សែននាក់ រស់នៅអមសងខាង និងទទួលផលប្រយោជន៍ពីព្រែកជីកនេះ។ ព្រែកជីកហ្វូណនតេជោ ត្រូវបានតភ្ជាប់ប្រព័ន្ធដៃទន្លេមេគង្គ និងផ្លូវសមុទ្រ ប្រវែងសរុបប្រមាណ១៨០គីឡូម៉ែត។ ទីតាំងគឺចាប់ពីព្រែកតាកែវ ឆ្លងកាត់ព្រែកតាឯកចូលតាមព្រែកតាហ៊ីង និងបន្តរហូតដល់សមុទ្រខេត្តកែប ហើយព្រែកជីកនេះមានទទឹងខាងលើ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ (ជម្រៅនាវា ៤,៧ម៉ែត្រ)។ ចំពោះ ហេដ្ឋារចនាសម្ព័នរួមមាន សន្ទះផ្លុវនាវាចរណ៍មាន៣កន្លែង ស្ពាន១១កន្លែង ផ្លូវអមសងខាងប្រវែងសរុបប្រមាណ២០៨គីឡូម៉ែត្រ ដោយគ្រោងសាងសង់ ប្រើប្រាស់ពេលវេលាចំនួន៤ឆ្នាំ ព្រែកជីក នេះបាននាំមកនូវអត្ថប្រយោជន៍ដូចជា កាត់បន្ថយរៈពេល ចម្ងាយ និងតម្លៃនៃការដឹកជញ្ជូននាពេលបច្ចុប្បន្ន ការបង្កើតតំបន់ពាណិជ្ជកម្ម និងមជ្ឈមណ្ឌលភស្តុភារកម្មការអភិវឌ្ឍផែរណបថ្មីៗជាជ្រើន ការពង្រីកតំបន់ អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ការជួយគាំទ្រ ដល់ការអភិវឌ្ឍប៉ូល សេដ្ឋកិច្ចទី៤ របស់កម្ពុជា ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផ្សេងៗទៀត ការជំរុញការអភិវឌ្ឍទីក្រុង នគរូបនីយកម្ម និងការជំរុញការរីកចម្រើនផ្នែកអចលនទ្រព្យ៕