កិច្ចប្រជុំរវាងក្រុមការងារនៃអាជ្ញាធរជាតិប្រយុទ្ធប្រឆាំងគ្រឿងញៀន និងក្រុមការងារទទួលបន្ទុកធ្វើតេស្តរកសារធាតុញៀន នៅក្នុងក្របខណ្ឌក្រសួងសាធារណការ និងដឹកជញ្ជូន ទីស្តីការក្រសួង៖ នាថ្ងៃចន្ទ ទី០៨ ខែកក្កដា ឆ្នាំ២០២៤ លោកជំទាវឧត្តមសេនីយ៍ឯក ឈឹម សិទ្ធិបុណ្យរិទ្ធ អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន និង ឯកឧត្តម ប៊ុន សុផាត អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញ ដឹកនាំកិច្ចប្រជុំ ដើម្បីពិនិត្យ និងពិភាក្សា អំពីដំណើរការសម្រាប់ការរៀបចំយុទ្ធនាការធ្វើតេស្តរកសារធាតុញៀន នៅក្នុងក្របខណ្ឌក្រសួងសាធារណការ និងដឹកជញ្ជូន ដោយមានការចូលរួម ពីសមាជិកក្រុមការងារពាក់ព័ន្ធទាំងអស់។ កិច្ចប្រជុំនេះ រៀបចំឡើងក្នុងគោលបំណងពិនិត្យលើរបៀបនៃការរៀបចំ បែបបទ នីតិវិធី និងរំហូរការងាររបស់ក្រុមការងារជំនាញទទួលបន្ទុកតាមផ្នែកដែលត្រូវបានបង្កើតឡើង ព្រមទាំងការណែនាំចែករំលែកបន្ថែម អំពីបទពិសោធន៍ដែលធ្លាប់បានអនុវត្តនារយៈពេលកន្លងមក ដើម្បីធានាឱ្យដំណើរការរៀបចំធ្វើតេស្តរកសារធាតុញៀន អាចដំណើរការទៅបានរលូន និងមានប្រសិទ្ធភាពខ្ពស់។ ក្រោយពីបញ្ចប់កិច្ចប្រជុំ ក្រុមការងារក៏បានអញ្ជើញទៅពិនិត្យទីតាំងផ្ទាល់តែម្តង ដែលគ្រោងរៀបចំនៅសាលប្រជុំធំ នៃទីស្តីការក្រសួងសាធារណការ និងដឹកជញ្ជូន។ សូមជម្រាបជូនផងដែរថា យុទ្ធនាការធ្វើតេស្តរកសារធាតុញៀននៅក្នុងក្របខណ្ឌក្រសួងសាធារណការ និងដឹកជញ្ជូន គ្រោងនឹងរៀបចំឡើងរយៈពេល ៣ថ្ងៃ ដោយចាប់ផ្តើមពីថ្ងៃទី១០-១១-១២ ខែកក្កដា ឆ្នាំ២០២៤ ខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube