វគ្គបណ្ដុះបណ្ដាលការងារបច្ចេកទេស និងវិធីសាស្រ្តសាងសង់លើការងារក្រាលស្រទាប់គ្រឹះសំខាន់ថ្មកិនថ្មី លើស្រទាប់ផ្ទៃលើបេតុងកៅស៊ូ (AC) ផ្លូវចាស់ ដោយក្រុមហ៊ុនសាជីវកម្មស្ពានថ្នល់ចិន (CRBC) ទីស្ដីការក្រសួង៖នាព្រឹកថ្ងៃអង្គារ ទី០២ ខែកក្កដា ឆ្នាំ២០២៤ ឯកឧត្ដម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ ស្តាប់ការធ្វើបទបង្ហាញលើការងារបច្ចេកទេស និងវិធីសាស្រ្តសាងសង់លើការងារក្រាលស្រទាប់គ្រឹះសំខាន់ថ្មកិនថ្មី លើស្រទាប់ផ្ទៃលើបេតុងកៅស៊ូ (AC) ផ្លូវចាស់ ដោយក្រុមហ៊ុនសាជីវកម្មស្ពានថ្នល់ចិន (CRBC) ដោយមានការអញ្ជើញចូលរួមពីថ្នាក់ដឹកនាំក្រសួង អង្គភាព មន្ទីររាជធានី - ខេត្ត និងមន្ត្រីបច្ចេកទេសជំនាញពាក់ព័ន្ធ។ វគ្គបណ្ដុះបណ្ដាលនេះ ត្រូវបានរៀបចំឡើង ក្នុងគោលបំណងផ្តល់ឱ្យវិស្វករ អ្នកជំនាញ និងផ្នែកពាក់ព័ន្ធទាំងអស់ ស្វែងយល់បន្ថែមនូវវិធីសាស្ត្រជួសជុស ថែទាំផ្លូវថ្នល់ ដែលធ្វើបទបង្ហាញដោយអ្នកជំនាញការ មកពីក្រុមហ៊ុនសាជីវកម្មស្ពាន និងថ្នល់ចិន (China Road and Bridge Cooperation – (CRBC) ដើម្បីទទួលបានជាធាតុចូលសំខាន់ៗ នៅក្នុងការឌីហ្សាញផ្លូវថ្នល់ ក្នុងន័យអនុវត្តការងារស្ថាបនាផ្លូវឱ្យកាន់តែមានគុណភាព និងប្រសិទ្ធភាព ស្របនឹងតម្រូវការប្រើប្រាស់ និងចក្ខុវិស័យក្នុងការស្ថាបនាផ្លូវជាតិសំខាន់ៗផងដែរ។ ឯកឧត្ដមរដ្ឋលេខាធិការ បានរំលេចពីសារៈសំខាន់ក្នុងការរៀបចំ វគ្គបណ្ដុះបណ្ដាលបច្ចេកទេសនីមួយៗ ដែលមិនមែនត្រឹមតែការបណ្ដុះបណ្ដាលតែមួយផ្នែកនោះទេ ការរៀបចំនេះក៏ជាវេទិកាមួយសម្រាប់អ្នកបច្ចេកទេសផ្លូវថ្នល់ ក្នុងការផ្លាស់ប្តូរបទពិសោធន៍ការងារ ចែករំលែកនូវចំណេះដឹង ចំណេះធ្វើ ដែលបានឆ្លងកាត់កន្លងមកលើការងារ សាងសង់ទៅតាមស្ថានភាពទីតាំងភូមិសាស្រ្តរៀងៗខ្លួន ក្នុងនោះផងដែរ ឯកឧត្ដមរដ្ឋលេខាធិការប្រធានអង្គប្រជុំ ក៏បានជំរុញឱ្យសិក្ខាកាមយកចំណេះ ដែលទទួលបាន បម្រើដល់ការអនុវត្តការងារប្រចាំថ្ងៃ ក៏ដូចជាធ្វើការបណ្តុះបណ្ដាលបន្ត ដើម្បីបំពេញបន្ថែមនូវចំណុចដែលកំពុងខ្វះខាត របស់ក្រុមការងារបច្ចេកទេសនៃសាមីអង្គភាពនីមួយៗ ក្នុងន័យចូលរួមពង្រឹងនូវគុណភាពការងារសាងសង់ ហេដ្ឋារចនាសម្ព័ន្ធផ្លូវថ្នល់ ឱ្យរឹតតែមានភាពល្អប្រសើរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube