ឯកឧត្តម តូច ចាន់កុសល រដ្ឋលេខាធិការ និងជាប្រធានគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ តំណាងឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា នៅល្ងាចថ្ងៃទី២៧ ខែមិថុនា ឆ្នាំ២០២៤ បានអញ្ជើញចូលរួមជាអធិបតីភាពក្នុងពិធីទទួលស្វាគមន៍ដំណើរប្រតិបត្តិការដឹកជញ្ជូនសាកល្បង ពីទីក្រុងគុនមីង (ប្រទេសចិន) មកកាន់ភ្នំពេញ (ប្រទេសកម្ពុជា) សម្រាប់ការអនុវត្តកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ “ដំណាក់កាលប្រមូលផលដំបូង” នៅមជ្ឈមណ្ឌលបង្រៀនបើកបរយានយន្តធុនធ្ងន់ព្រែកព្នៅ រាជធានីភ្នំពេញ ។ ក្នុងដំណើរការរត់សាកល្បង EH CBTA Trial Run នេះ គឺមានក្បួនរថយន្តចំនួន ០៧គ្រឿង (ដែលយានយន្តដឹកទំនិញចំនួន ០៥គ្រឿង គឺដឹកបន្លែស្រស់ សម្ភារការិយាល័យ គ្រឿងសង្ហារិម និងទំនិញផ្សេងៗទៀត,និងយានយន្តដឹកអ្នកដំណើរចំនួន ០២គ្រឿងទៀត គឺដឹកប្រតិភូ GMS ប្រតិបត្តិករដឹកជញ្ជូន អ្នកជំនាញការ និងអ្នកកាសែត) ដោយបានចាកចេញពីទីក្រុងគុនមីងក្នុងខេត្តយូណាន នៃសាធារណរដ្ឋប្រជាមានិតចិន នាថ្ងៃទី២២ ខែមិថុនា ឆ្នាំ២០២៤។ ក្បួនរថយន្តបានចូលប្រទេសឡាវ តាមច្រកព្រំដែន Mohan-Boten នាថ្ងៃទី២៣ ខែមិថុនា ឆ្នាំ២០២៤ ហើយបានបន្តធ្វើដំណើរឆ្លងកាត់ប្រទេសឡាវ ចូលប្រទេសថៃ តាមច្រកព្រំដែន Huayxay-Chiang Khong ដោយឆ្លងកាត់ស្ពានមិត្តភាពទី៤ នៅថ្ងៃបន្ទាប់។ នេះជាលើកទីមួយហើយ ដែលយានយន្តដឹកជញ្ជូនរបស់ ចិន ធ្វើ ប្រតិបត្តិការ ដឹកជញ្ជូនក្នុង ប្រទេស ថៃ។ ត្បិតនីតិវិធីឆ្លងកាត់ព្រំដែន ត្រូវចំណាយពេលមួយរយៈ ប៉ុន្តែ ត្រូវបានបញ្ចប់ ដោយជោគជ័យ ខណៈដែលប្រតិបត្តិករ ចិន បានធ្វើការជាមួយភ្នាក់ងារ និង Broker ក្នុងតំបន់ តាម បណ្តោយផ្លូវ ដែលបានឆ្លងកាត់នេះ ដើម្បីអាចបំពេញសំណុំបែបបទឱ្យស្របតាមនីតិវិធីថ្មីៗរបស់ប្រទេសនីមួយៗ។ ឯកឧត្តម តូច ចាន់កុសល បានមានប្រសាសន៍ថា ថ្ងៃនេះ ជាថ្ងៃដ៏ល្អមួយ ដែលយើងស្វាគមន៍យានយន្តដឹកជញ្ជូនពីប្រទេសចិន មកកាន់រាជធានីភ្នំពេញ ជាលើក ដំបូង ក្នុងប្រវត្តិសាស្ត្រ។ កិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែននៃមហាអនុតំបន់មេគង្គ (ហៅកាត់ថា GMS CBTA) បានបំពេញបន្ថែមទៅឱ្យការអនុវត្តគំនិតផ្តួចផ្តើមខ្សែក្រវាត់ និងផ្លូវ (BRI របស់ចិន) ដើម្បីជាប្រយោជន៍ដល់ប្រទេស GMS ទាំងអស់។ រាជរដ្ឋាភិបាលកម្ពុជា ក៏ទន្ទឹងរង់ចាំរៀបចំដំណើរការរត់សាកល្បងស្រដៀងគ្នានេះ សម្រាប់ប្រតិបត្តិការដឹកជញ្ជូនតាមផ្លូវគោក រវាងប្រទេសកម្ពុជាជាមួយប្រទេសជិតខាងផងដែរ។ ឯកឧត្តមរដ្ឋលេខាធិការ បានមានប្រសាសន៍បញ្ជាក់ថា GMS CBTA គឺជាគំនិតផ្តួចផ្តើមដ៏សំខាន់មួយរបស់មហាអនុតំបន់មេគង្គ (GMS) ដែលត្រូវបានបង្កើតឡើងក្នុងគោលបំណងដើម្បីកាត់បន្ថយថ្លៃដឹកជញ្ជូនផ្លូវគោកជាអន្តរជាតិ និងជំរុញកិច្ចខិតខំប្រឹងប្រែងរបស់ប្រទេសជាសមាជិក GMS ជាធ្លុងមួយឱ្យអស់ពីលទ្ធភាពក្នុងការវិនិយោគលើហេដ្ឋារចនាសម្ព័ន្ធដឹកជញ្ជូនផ្លូវថ្នល់។ជាមួយនឹងកូតាយានយន្តចំនួន ៥០០ គ្រឿង (យានយន្តដឹកទំនិញ និងយានយន្តដឹកអ្នកដំណើរ) សម្រាប់ប្រទេស GMS នីមួយៗ, GMS CBTA អនុញ្ញាតឱ្យប្រតិបត្តិករដឹកជញ្ជូន អាចដឹកជញ្ជូនទំនិញ និងអ្នកដំណើរ ‘ពីផ្ទះមួយទៅដល់ផ្ទះមួយទៀត’ ឬ ‘ពីទីក្រុងមួយទៅក្រុងមួយទៀត’ ‘តាមបណ្តាញផ្លូវតភ្ជាប់ប្រទេស GMS ទាំង៦ (កម្ពុជា ចិន ឡាវ មីយ៉ាន់ម៉ា ថៃ និងវៀតណាម)។ ការប្រើប្រាស់ GMS CBTA អាចជួយឱ្យប្រតិបត្តិករដឹកជញ្ជូន កាត់បន្ថយពេលវេលាដែលត្រូវការសម្រាប់ការជម្រះបែបបទពាក់ព័ន្ធ ឬនីតិវិធីឆ្លងកាត់ព្រំដែនជាអន្តរជាតិ ដោយមិនតម្រូវឱ្យមានការលើកដាក់ទំនិញឡើងវិញ ខណៈ អ្នកដំណើរនៅតែអាចអង្គុយលើយានយន្តដឹកអ្នកដំណើរនោះ ដដែល។ លិខិតអនុញ្ញាតដឹកជញ្ជូនតាមផ្លូវគោករបស់ GMS CBTA គឺមានសុពលភាពក្នុងប្រទេស GMS ទាំង៦ ដូចៗគ្នា។ គួរបញ្ជាក់ថា តាមរយៈការដឹកជញ្ជូនដោយប្រើប្រាស់យន្តការ GMS CBTA នេះ គឺអាចបង្កើននូវការប្រកួតប្រជែងក្នុងអនុតំបន់ GMS ដោយនាំមកនូវផលប្រយោជន៍សេដ្ឋកិច្ចដល់ម្ចាស់អាជីវកម្ម និងអ្នកប្រើប្រាស់ (ទំនិញ និងមធ្យោបាយដឹកជញ្ជូន)។ បើយើងផ្គួបផ្សំជាមួយនឹងការវិនិយោគលើការដឹកជញ្ជូនតាមផ្លូវអាកាស ផ្លូវសមុទ្រ និងផ្លូវដែក ដែលមានជាអាទិ៍៖អាកាសយានដ្ឋានអន្តរជាតិតេជោភ្នំពេញ (នាពេលអនាគតឆាប់ៗខាងមុខនេះ) និងការតភ្ជាប់ផ្លូវរថភ្លើងល្បឿនលឿនពីគុនមីងទៅបាងកក… គឺវាចូលរួមបង្កើននូវសក្តានុពល ដល់ការដឹកជញ្ជូនពហុរូបភាព (Multimodal Transport) និងទេសចរណ៍ពហុទិស (Multi-destination Tourism) ដោយនាំមកនូវការដឹកជញ្ជូនតាមផ្លូវគោកក្នុងអនុតំបន់មួយ ដែលរត់ទាន់បរិបទដឹកជញ្ជូនក្នុងសតវត្សទី២១នេះ។