កិច្ចប្រជុំក្រុមការងារដើម្បីពិនិត្យ និងពិភាក្សាលើការពិនិត្យឡើងវិញ និងការវិភាគមុខងារនិងរចនាសម្ព័ន្ធ ក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃចន្ទ ទី១៧ ខែមិថុនា ឆ្នាំ២០២៤ ឯកឧត្តម ស៊ុយ សាន រដ្ឋលេខាធិការ និងជាប្រធានក្រុមការងារកែទម្រង់រដ្ឋបាលសាធារណៈ នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារដើម្បីពិនិត្យ និងពិភាក្សាលើការពិនិត្យឡើងវិញ និង ការវិភាគមុខងារនិងរចនាសម្ព័ន្ធ ក្រសួងសាធារណការ និងដឹកជញ្ជូន ដោយមានការចូលរួមពី ឯកឧត្តម លោក លោកស្រី ជាអនុប្រធាន សមាជិក សមាជិកាក្រុមការងារ និងមន្ត្រីពាក់ព័ន្ធជាច្រើនរូប។ កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យ និងពិភាក្សាលើវឌ្ឍនភាពការងារ នៃការរៀបចំការវិភាគមុខងារ និងរចនាសម្ព័ន្ធ របស់អគ្គនាយកដ្ឋាន និងនាយកដ្ឋាននីមួយៗ ដើម្បីវិភាគលើបញ្ហាប្រឈម ដែលបានជួបប្រទះអំឡុងពេលអនុវត្តការងារកន្លងមក និងស្វែងរកដំណោះស្រាយ សំដៅជំរុញ និងពន្លឿនការបូកសរុបរបាយការណ៍ លើការវិភាគមុខងារ និងរចនាសម្ព័ន្ធរបស់ក្រសួង ស្ថាប័ន ឱ្យបានត្រឹមត្រូវ និងទាន់ពេលវេលាតាមការកំណត់របស់ ក្រសួងមុខងារសាធារណៈ។ ឯកឧត្តមរដ្ឋលេខាធិការប្រធានអង្គប្រជុំ បានណែនាំដល់គ្រប់ភាគីពាក់ព័ន្ធទាំងអស់ ត្រូវសហការគ្នាឱ្យបានជិតស្និទ្ធ ក្នុងការផ្តល់ព័ត៌មានគ្នាទៅវិញទៅមក ឱ្យបានគ្រប់ជ្រុងជ្រោយ និងបានស្នើដល់ថ្នាក់ដឹកនាំគ្រប់អង្គភាពពាក់ព័ន្ធ ត្រូវជួយពន្លឿនលើការវិភាគមុខងារ និងរចនាសម្ព័ន្ធក្រសួងសាធារណការ និងដឹកជញ្ជូន ដាក់ជូនលេខាធិការដ្ឋានកណ្ដាលក្រសួង ដើម្បីពិនិត្យ វាយតម្លៃ និងបូកសរុបលទ្ធផលតាមការគ្រោងទុក។ ទន្ទឹមនឹងនោះ ឯកឧត្តមរដ្ឋលេខាធិការ រំពឹងថាថ្នាក់ដឹកនាំគ្រប់អគ្គនាយកដ្ឋាន និងនាយកដ្ឋានទាំងអស់ យកចិត្តទុកដាក់ និងជួយជ្រោមជ្រែង ក៏ដូចជាបើកការជជែកពិភាក្សាជាមួយមន្ត្រីក្រោមឱវាទ ដើម្បីឱ្យការវិភាគមុខងារ និងរចនាសម្ព័ន្ធបានទាន់ពេលវេលា តាមការណែនាំរបស់រាជរដ្ឋាភិបាលអាណត្តិទី៧៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube