សូមបងប្អូនអ្នកបើកបរគ្រប់រូប ត្រូវបង្កើនស្មារតីប្រុងប្រយ័ត្នខ្ពស់ និងកុំបំពាន នៅត្រង់ចំណុចផ្លូវរថភ្លើងឆ្លងកាត់!!! ជាថ្មីម្តងទៀត ក្រសួងសាធារណការ និងដឹកជញ្ជូន សូមសំណូមពរដោយទទូចទៅកាន់បងប្អូនអ្នកបើកបរ និងអ្នកធ្វើដំណើរគ្រប់រូប នៅពេលបើកបរត្រង់ចំណុចដែលមានផ្លូវរថភ្លើងឆ្លងកាត់ ត្រូវបង្កើនការយកចិត្តទុកដាក់ខ្ពស់ ដោយពិនិត្យមើលស្ថានភាពជុំវិញ និងគោរពតាមផ្លាកសញ្ញា របារការពារ និងការបញ្ជារបស់ឆ្មាំដែលប្រចាំការនៅទីតាំងនោះ។ សូមមេត្តាកុំធ្វេសប្រហែស និងកុំខ្លាចយឺតយ៉ាវពេលវេលាបន្តិចបន្តួចក្នុងការធ្វើដំណើរ ដែលវាអាចនឹងបង្កជាគ្រោះថ្នាក់ និងវិប្បដិសារីដល់ខ្លួនឯង គ្រួសារ និងអ្នកធ្វើដំណើរជុំវិញ។ យើងខ្ញុំសូមរំលឹកអំពីចំណុចមួយចំនួន ដែលបងប្អូនត្រូវយកចិត្តទុកដាក់ពេលបើកបរឆ្លងកាត់ផ្លូវរថភ្លើង៖ ១. អ្នកបើកបរ ត្រូវបន្ថយល្បឿន នៅពេលជិតដល់ផ្លូវរថភ្លើង និងពិនិត្យមើលឆ្វេង ស្តាំ មុននឹងឆ្លងកាត់។ ២. នៅកន្លែងផ្លូវថ្នល់កាត់ផ្លូវរថភ្លើង ដែលមានដាក់របារ ឬរបាំង អ្នកបើកបរមិនត្រូវបរចូលទៅទីនោះ នៅពេលដែលរបាំងនោះបិទ ឬកំពុងបិទ ឬកំពុងបើកឡើយ។ ៣. នៅកន្លែងមានឆ្មាំនៅត្រង់ផ្លូវរថភ្លើងឆ្លងកាត់ អ្នកបើកបរត្រូវស្តាប់បញ្ជាឆ្មាំហើយ មិនត្រូវបង្កឱ្យមានឧបសគ្គដល់ការបិទបើករបារ ឬរបាំងឡើយ។ ៤. កាលណាមានរថភ្លើងមកជិតដល់ អ្នកប្រើប្រាស់ផ្លូវគ្រប់រូប ត្រូវឈប់ជាបន្ទាន់ ដើម្បីទុកផ្លូវឱ្យរថភ្លើងធ្វើចរាចរណ៍ទៅមុន។ ៥.គង្វាលសត្វទាំងអស់ ត្រូវរកវិធីទប់ស្កាត់ហ្វូងសត្វពាហនៈជាដាច់ខាត កុំឱ្យឆ្លងកាត់ ផ្លូវរថភ្លើង ពេលដែលរថភ្លើងជិតមកដល់។ ៦.កាលណារថភ្លើងបន្លឺសញ្ញាជិតមកដល់ អ្នកបើកបរយាន្តជំនិះគ្រប់រូបត្រូវឈប់យ៉ាងតិច ២ម៉ែត្រ ពីរបារ ឬរបាំង ហើយបើគ្មានរបារ ឬរបាំង ត្រូវឈប់យ៉ាងតិច ៥ម៉ែត្រ ពីផ្លូវរថភ្លើង។ ៧.ក្នុងករណីដែលយានជំនិះគាំងមិនដំណើរ ឬហ្វូងសត្វ ធ្វើដំណើរចូលមកជ្រុលទៅលើផ្លូវរថភ្លើង អ្នកបើកបរឬគង្វាលសត្វ ត្រូវរិះរកមធ្យោបាយកុំឲ្យមានកើតជាឧបសគ្គដល់រថភ្លើង ឬត្រូវឱ្យដំណឹងដល់ភ្នាក់ងារទទួលខុសត្រូវផ្លូវរថភ្លើងដែលនៅជិតបំផុត អំពីគ្រោះថ្នាក់ដែលនឹងអាចកើតឡើងបាន ប្រសិនបើខ្លួនមិនអាចបញ្ចៀសឧបសគ្គលើផ្លូវរថភ្លើងដោយខ្លួនឯងបាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.YouTube