ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានជូនដំណឹងដល់អតិថិជនទាំងអស់ឱ្យបានជ្រាបពីការវិលត្រឡប់មកតម្លៃដើមវិញជាដំណាក់កាល នៃថ្លៃធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុ។ បើតាមសេចក្ដីជូនដំណឹងរបស់ក្រុមហ៊ុនកាលពីថ្ងៃទី២៤មេសាម្សិលមិញបញ្ជាក់ថា ក្រុមហ៊ុនត្រូវគិតថ្លៃសេវាធ្វើដំណើរពេញលេញឡើងវិញ តាំងពីថ្ងៃទី០១ ខែវិច្ឆិកា ឆ្នាំ២០២៣មកម្ល៉េះ ប៉ុន្តែដើម្បីថ្លែងអំណរគុណទៅដល់សង្គមជាតិ និងអតិថិជនដែលតែងតែគាំទ្រ និងប្រើប្រាស់ផ្លូវល្បឿនលឿន ជួយដល់កំណើនសេដ្ឋកិច្ច ព្រមទាំងជួយជម្រុញដល់វិស័យដឹកជញ្ជូននៅកម្ពុជាឱ្យកាន់តែប្រសើរឡើង រាជរដ្ឋាភិបាលកម្ពុជា រួមជាមួយថ្នាក់ដឹកនាំរបស់ក្រុមហ៊ុន បានសម្រេចបន្តការបញ្ចុះតម្លៃ២០ភាគរយ ក្នុងលក្ខណ្ឌផ្សេងៗគ្នាជូនអតិថិជនផ្លូវល្បឿនលឿន។ ការបញ្ចុះតម្លៃនេះ បានបែងចែកចេញជាដំណាក់កាល និងតាមគោលការណ៍ដូចជា៖ ១.បន្តរក្សាការបញ្ចុះតម្លៃ២០ភាគរយសម្រាប់អតិថិជនដែលប្រើប្រាស់គន្លងETCនិងANPR ដែលគិតចាប់ពីថ្ងៃប្រកាសសេចក្តីជូនដំណឹងនេះតទៅរហូតដល់ថ្ងៃទី៣១ ខែតុលា ឆ្នាំ២០២៤ ។ ចាប់ពីថ្ងៃទី១ ខែវិច្ឆិកា ឆ្នាំ២០២៤ ថ្លៃសេវានឹងត្រឡប់មកតម្លៃដើមវិញ។ ២.ចំពោះការទូទាត់ជាសាច់ប្រាក់សុទ្ធ (MTC) នឹងត្រឡប់តម្លៃសេវាធ្វើដំណើរមកតម្លៃដើមវិញចាប់ ពីថ្ងៃទី១ ខែឧសភា ឆ្នាំ២០២៤។ ៣.ចាប់ពីថ្ងៃទី១ ខែមេសា ឆ្នាំ២០២៤នេះតទៅ សាធារណជនគ្រប់រូបអាចបំពាក់ឧបករណ៍ ETC ដោយឥតគិតថ្លៃបាន ដោយគ្រាន់តែបញ្ចូលទឹកប្រាក់ក្នុងគណនីចំនួន២០ដុល្លារ។ សាធារណជនគ្រប់រូបអាចស្នើសុំឧបករណ៍ ETC បាននៅតាមអគាររដ្ឋបាលនៅគ្រប់ច្រកចូលផ្លូវល្បឿន លឿន និង មជ្ឈមណ្ឌលផ្តល់សេវាកម្ម ETC ដែលមានទីតាំង នៅខាងស្តាំ ដៃបញ្ចរបង់ប្រាក់ភ្នំពេញ និងក្រុងព្រះសីហនុ។ ក្រុមហ៊ុនលើកទឹកចិត្តឱ្យសាធារណជនទាំងអស់គ្នាបំពាក់ឧបករណ៍ ETC បានកាន់តែច្រើន ដើម្បីទទួលបានការបញ្ចុះតម្លៃ បង្កើនប្រសិទ្ធភាពចរាចរណ៍ និងកាត់បន្ថយការកកស្ទះ ។ ៤.ការអនុគ្រោះផ្សេងៗសម្រាប់ភ្ញៀវ VIP មិនទទួលផលប៉ះពាល់ពីគោលការណ៍ខាងលើឡើយ ដោយក្រុមហ៊ុននឹងបន្តរក្សាការអនុគ្រោះតាមកិច្ចព្រមព្រៀងដែលភាគីទាំងពីរបានចុះហត្ថលេខា។ សូមជម្រាបជូនថា ក្រុមហ៊ុនផ្លូវល្បឿនលឿននេះ បានបើកឱ្យប្រើប្រាស់សាកល្បងដំបូងនាចុងឆ្នាំ២០២២ និងបានបើកឱ្យធ្វើដំណើរដោយមិនបង់ប្រាក់ខែរយៈពេល១ខែ។ បន្ទាប់មកក៏បានបញ្ចុះតម្លៃ២០ភាគរយៈរយៈពេល១ឆ្នាំ ចាប់ពីថ្ងៃ៣១ វិច្ឆិកា ២០២២ ដល់ថ្ងៃ៣១ តុលា ២០២៣៕