ផ្លូវល្បឿនលឿនភ្នំពេញបាវិតដែលវិនិយោគចាយទុនជាងមួយពាន់លានដុល្លារ នៅតែបន្តវឌ្ឍនភាពបោះជំហានទៅមុខ។ នេះបើតាមលោក ផន រីម អ្នកនាំពាក្យក្រសួងសាធារណការ និងដឹកជញ្ជូនប្រាប់កម្ពុជាថ្មី កាលពីរសៀលថ្ងៃពុធម្សិលមិញនេះ។លោក ផន រីម បានឲ្យដឹងថា ផ្លូវល្បឿនលឿនភ្នំពេញ-បាវិត គឺជាគម្រោងផ្លូវល្បឿនលឿនទី ២ របស់កម្ពុជា ដែលបានបើកការដ្ឋានសាងសង់កាលពីថ្ងៃទី ០៧ មិថុនា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី។បើតាមអ្នកនាំពាក្យរូបនេះ បច្ចុប្បន្នគម្រោងសាងសង់ស្ថិតក្នុងដំណើរនីតិវិធីជាច្រើន និងសម្រេចលទ្ធផលបាន ០,០៨ ភាគរយ ខណៈរយៈពេលនៃការសាងសង់ចំនួន ៤៨ ខែ។ផ្លូវល្បឿនលឿនភ្នំពេញបាវិត ចាយទឹកប្រាក់វិនិយោគប្រមាណ ១.៣៦៧ លានដុល្លារអាមេរិក ដែលទីតាំងនៃខ្សែផ្លូវគឺចាប់ពីឃុំថ្មគរ ស្រុកល្វាឯម ខេត្តកណ្ដាល និងទៅដល់ខេត្តស្វាយរៀង ឆ្ពោះទៅកាន់ក្រុងបាវិត ព្រំដែនកម្ពុជា វៀតណាម។ ការដ្ឋានផ្លូវនេះមានការសាងសង់ស្ពានឆ្លងកាត់ទន្លេមេគង្គនៅស្រុកកៀនស្វាយ ដែលគ្រោងចាយថវិកាប្រមាណ ២៣២,៥៨ លានដុល្លារអាមេរិក ដែលជាថវិកាវិនិយោគរបស់រាជរដ្ឋាភិបាល។ ទាក់ទងដំណើរការសាងសង់ស្ពានឆ្លងកាត់ទន្លេមេគង្គតភ្ជាប់ទៅគម្រោងផ្លូវល្បឿនលឿនភ្នំពេញបាវិត បើតាមមន្រ្តីអ្នកនាំពាក្យក្រសួងសាធារណការ លោក ផន រីម អះអាងថាសម្រេចបានលទ្ធផលមួយចំនួនផងដែរ។ ផ្លូវល្បឿនលឿនភ្នំពេញបាវិត ជាគម្រោងផ្លូវល្បឿនលឿនទីពីររបស់កម្ពុជាដែលបានបើកការដ្ឋានសាងសង់កាលពីថ្ងៃ ០៧ មិថុនា ឆ្នាំ ២០២៣ ក្រោមទម្រង់វិនិយោគ BOT។ ផ្លូវនេះមានតម្លៃផ្នែកដឹកជញ្ជូនតភ្ជាប់ពីរាជធានីភ្នំពេញទៅក្រុងបាវិត ដែលជាតំបន់ឧស្សាហកម្មនិងពាណិជ្ជកម្មដ៏ធំនៅជាប់ព្រំដែនវៀតណាម។ តាមរយៈគម្រោងផ្លូវនេះ នឹងជំរុញឱ្យមានកំណើនវិនិយោគ ពាណិជ្ជកម្ម និងទេសចរណ៍ និងភាពប្រទាក់ក្រឡាគ្នាជាមួយបណ្ដាញខ្សែផ្លូវផ្សេងៗ។ ម្យ៉ាងទៀតក៏នឹងក្លាយជាផ្នែកមួយយ៉ាងសំខាន់ក្នុងការបំពេញបន្ថែមនូវផ្លូវអាស៊ាន High Way ដែលនឹងជួយសម្រួលបន្ថែមការតភ្ជាប់ប្រទាក់ក្រឡាផ្ទៃក្នុងប្រទេស និងការតភ្ជាប់កម្ពុជាទៅក្នុងក្របខណ្ឌតំបន់អាស៊ាន និងមហាអនុតំបន់មេគង្គ ដើម្បីពង្រឹងសក្ដានុពលទីផ្សារ ការប្រកួតប្រជែង និងភាពធន់សេដ្ឋកិច្ចសង្គម។ រដ្ឋាភិបាលកម្ពុជាក៏បានពិភាក្សាជាមួយភាគីវៀតណាម ដើម្បីតភ្ជាប់គម្រោងផ្លូវល្បឿនលឿនភ្នំពេញបាវិតទៅផ្លូវល្បឿនលឿនរបស់វៀតណាមម៉ុកបៃហូជីមិញ ខណៈក្រុមបច្ចេកទេសប្រទេសទាំងពីរកំពុងសិក្សាកំណត់ទីតាំងសម្រាប់តភ្ជាប់គ្នា៕