សកម្មភាពចុះពិនិត្យលើការអនុវត្តគម្រោងលើកកម្ពស់ការផ្គត់ផ្គង់ទឹកស្អាតនិងអនាម័យ (WaSSIP) ក្នុងក្រុងសៀមរាប និងការផ្តល់វិញ្ញាបនបត្រជូនមន្រ្តីរាជការនៃអង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាបដែលបានចូលរួមក្នុងការអនុវត្តក្របខ័ណ្ឌ Utility of the Future (UoF) សៀមរាប៖ នៅថ្ងៃទី២៥ ខែមីនា ឆ្នាំ២០២៤ ឯកឧត្តម កឹម បូរី អនុរដ្ឋលេខាធិការ និងជាប្រធានគ្រប់គ្រង និងសម្របសម្រួលគម្រោង នៃក្រសួងសាធារណការ និងដឹកជញ្ជូន រួមជាមួយលោកស្រី Maria Angelica Sotomayor ប្រធានគ្រប់គ្រងផ្នែកទឹក ទទួលបន្ទុកសម្រាប់អាស៊ីខាងកើត និងប៉ាស៊ីហ្វិក នៃធនាគារពិភពលោក បានចុះពិនិត្យផ្ទាល់សកម្មភាពការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) នៅក្រុងសៀមរាប និងផ្តល់វិញ្ញាបនបត្រជូនមន្រ្តីរាជការ សរុបចំនួន ២៦នាក់ ដែលបានចូលរួមក្នុងការអនុវត្តក្របខ័ណ្ឌ Utility of the Future (UoF) ក្រោមក្របខ័ណ្ឌហិរញ្ញប្បទានពីធនាគារពិភពលោក។ បេសកកម្មនេះមានការចូលរួមពីថ្នាក់ដឹកនាំ មន្ត្រីជំនាញនៃមន្ទីរសាធារណការ និងដឹកជញ្ជូនខេត្ត និងខាងធនាគារពិភពលោក ផងដែរ។ គោលបំណងនៃការចុះបេសកកម្មនេះ គឺដើម្បីធ្វើការពិនិត្យទៅលើការងារអនុវត្តផ្ទាល់ និងស្រង់យោបល់អ្នកដែលបានតភ្ជាប់បណ្តាញប្រព័ន្ធលូរួចហើយ ផ្តល់ចំណាប់អារម្មណ៍ចំពោះការប្រើប្រាស់ នៅសហគមន៍របស់ពួកគាត់ មុនពេលភ្ជាប់ និងកំឡុងពេលកំពុងប្រើប្រាស់ មានលទ្ធផលល្អប្រសើកម្រិតណា។ ក្នុងក្របខ័ណ្ឌ Utility of the Future នេះដែរ នឹងជួយជម្រុញដល់អង្គភាពគ្រប់គ្រងប្រព័ន្ធចម្រោះទឹកកខ្វក់ បង្កើនប្រសិទ្ធភាពការងារសំដៅដល់ការពង្រឹង និងពង្រីកការផ្តល់សេវាទឹកកខ្វក់ប្រកបដោយទស្សនៈវិស្ស័យ ផែនការច្បាស់លាស់ តម្លាភាព និងការទទួលខុសត្រូវ។ ជាលទ្ធផលក្នុងដំណើបេសកកម្មនេះ គឺទទួលបានការសាទរ គាំទ្រពីប្រជាពលរដ្ឋ ចំពោះគម្រោងនេះដែលបានសាងសង់បណ្តាញលូថ្មីជូនសហគមន៍ពួកគាត់ ព្រមទាំងផ្តល់ការតភ្ជាប់ពីក្នុងគេហដ្ឋានមក ដោយឥតគិតថ្លៃថែមទៀត។ ទាំងនេះគឺជាការរួមចំណែកយ៉ាងសំខាន់ក្នុងការជួយកាត់បន្ថយការបំពុលបរិស្ថាន។ សូមបញ្ជាក់ថាគម្រោងនេះនឹងសាងសង់បណ្តាញលូប្រវែងប្រមាណ ២២គម និងតំណភ្ជាប់ប្រមាណ ២,២៤៤ តំណ ដើម្បីប្រមូលទឹកកខ្វក់បញ្ជូនទៅកាន់ស្ថានីយប្រព្រឹត្តកម្មដែលមានស្រាប់ មុននឹងបញ្ចេញទៅប្រភពទឹកសាធារណៈស្របតាមបទដ្ឋានបច្ចេកទេស៕