គណៈប្រតិភូក្រសួងសាធារណការ និងដឹកជញ្ជូន ថ្វាយកម្រងផ្កាគោរពដួងព្រះវិញ្ញាណក្ខន្ធព្រះបរមសព សម្តេចព្រះអគ្គមហាសង្ឃរាជាធិបតី ទេព វង្ស រាជធានីភ្នំពេញ៖ នារសៀលថ្ងៃសៅរ៍ ទី០២ ខែមីនា ឆ្នាំ២០២៤ ឯកឧត្តម ស៊ុយ សាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង នាំយកកម្រងផ្កាថ្វាយព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា ជាកិច្ចសម្តែងនូវការគោរពដួងព្រះវិញ្ញាណក្ខន្ធ ដែលទ្រង់បានយាងចូលទិវង្គត កាលពីល្ងាចថ្ងៃចន្ទ ទី២៦ ខែកុម្ភៈ ឆ្នាំ២០២៤ វេលាម៉ោង ១៧:៤០នាទី កន្លងទៅ ក្នុងព្រះជន្មាយុ ៩៣ព្រះវស្សា ដោយព្រះជរាពាធ។ កិច្ចពិធីបានប្រព្រឹត្តទៅនៅក្នុង រោងព្រះរាជពិធីបុណ្យថ្វាយព្រះបរមសព ស្ថិតក្នុងបរិវេណវត្តឧណ្ណាលោម នៅតាមបណ្ដោយមហាវិថីសម្តេចសុធារស សង្កាត់ជ័យជំនះ ខណ្ឌដូនពេញ រាជធានីភ្នំពេញ។ ថ្នាក់ដឹកនាំ ព្រមទាំងមន្ត្រីរាជការក្រោមឱវាទក្រសួង ក៏ដូចជាបងប្អូនប្រជាពុទ្ធសាសនិកខ្មែរគ្រប់រូប ពិតជាមានសេចក្តីក្រៀមក្រំក្ដុលក្តួលជាអនេក ចំពោះការយាងចូលទិវង្គតរបស់ សម្ដេចព្រះអគ្គមហាសង្ឃរាជាធិបតី ដែលក្នុងមួយព្រះជន្មព្រះអង្គ បានឧទ្ទិសបូជាព្រះកាយក្នុងការចូលរួមទ្រទ្រង់ព្រះពុទ្ធសាសនាឱ្យបានគង់វង្ស និងរីកចម្រើនរុងរឿង ដើម្បីពុទ្ធបរិស័ទគ្រប់រូបចូលរួមគោរពប្រតិបត្តិតាម ហើយព្រះអង្គក៏បានបន្សល់ទុកនូវស្នាព្រហស្ថជាច្រើន ទាំងផ្នែកពុទ្ធចក្រ និងអាណាចក្រផងដែរ។ ទូលព្រះបង្គំយើងខ្ញុំទាំងអស់គ្នា សូមយកឱកាសនេះ ឧទ្ទិសថ្វាយនូវព្រះរាជកុសលដល់ដួងព្រះវិញ្ញាណក្ខន្ធរបស់ សម្ដេចព្រះអគ្គមហាសង្ឃរាជាធិបតី សូមព្រះអង្គបានយាងទៅកាន់ឋានព្រះបរមសុខ ជានិច្ចនិរន្តរ៍កុំបីឃ្លៀងឃ្លាតឡើយ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube