ភ្នំពេញ៖ ក្រសួងសារធារណការ និងដឹកជញ្ជូន រកចំណូលបានពីការលក់ស្លាកលេខយានយន្តពិសេសសរុបប្រមាណ ១៦លានដុល្លារអាម៉េរិក ពីចំនួនស្លាកលេខពិសេស និងពិសេសផ្ទាល់ខ្លួនដែលត្រូវបានចុះបញ្ជីសរុបចំនួន ២៦.៦៥៩គ្រឿង នៅក្នុងឆ្នាំ ២០២៣។ នេះបើតាមការអះអាងរបស់រដ្ឋមន្ត្រីក្រសួងសាធារណការ និងដឹកជញ្ជូន។ ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅឆ្នាំ ២០២៤ នៅថ្ងៃទី២៨ ខែកុម្ភៈ ឆ្នាំ២០២៤ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ក្នុងឆ្នាំ ២០២៣កន្លងទៅនេះ ក្រសួងសាធារណការ និងដឹកជញ្ជូន បានចុះបញ្ជីយានយន្តសរុបចំនួន ៦៥២.១៦៣គ្រឿង ដោយរួមបញ្ចូលទាំងយានយន្តដើរដោយថាមពលអគ្គិសនី (EV) ចំនួន ៦០៤គ្រឿងផងដែរ។ ចំពោះយានយន្តដែលបានចុះបញ្ជីស្លាកលេខពិសេស និងពិសេសផ្ទាល់ខ្លួន មានចំនួន ២៦.៦៥៩គ្រឿង ហើយទទួលបានចំណូលសរុបប្រមាណ ១៦លានដុល្លារអាម៉េរិក។ យានយន្តដែលត្រូវបានត្រួតពិនិត្យលក្ខណៈបច្ចេកទេសយានយន្ត (ចៀក) មានចំនួន ៦៥៦.៩១៦គ្រឿង។ លោក ប៉េង ពោធិ៍នា បានបន្តថា បើគិតពីឆ្នាំ១៩៩០ ដល់ត្រឹមខែធ្នូ ឆ្នាំ២០២៣ យានយន្តបានចុះបញ្ជីសរុបមានចំនួន ៧.៥៦៣.៣៩៦គ្រឿង ក្នុងនោះមានយានយន្តអគ្គិសនី (EV) បានចុះបញ្ជីមានចំនួនសរុប ១.៣៣៥គ្រឿង។ ក្រសួងក៏បានសាងសង់ និងដាក់ឱ្យប្រើប្រាស់ស្ថានីយសាកថ្មយានយន្តដើរដោយថាមពលអគ្គិសនី (EV) មានចំនួន ១៨ទីតាំង។ លោករដ្ឋមន្ត្រី បានគូសបញ្ជាក់ថា ចំពោះសមិទ្ធិផលការងារសុវត្ថិភាពចរាចរណ៍ផ្លូវគោកក្នុងឆ្នាំ២០២៣ រួមមាន៖ ទទួលបានការអនុម័តពីកិច្ចប្រជុំពេញអង្គគណៈរដ្ឋមន្ត្រីលើផែនការជាតិទសវត្សសកម្មភាពសុវត្ថិភាពចរាចរណ៍ផ្លូវគោកលើកទី២ ឆ្នាំ២០២១-២០៣០។ ក្រសួងបានបើកយុទ្ធនាការជិះម៉ូតូពាក់មួកសុវត្ថិភាពក្នុងក្រុងសៀមរាប និងបានប្រគល់មួកសុវត្ថិភាពចំនួន ៥០០មួក ជូនសិស្សានុសិស្ស និងលោកគ្រូ-អ្នកគ្រូ។ ដោយឡែក ក្រសួងបានចុះអប់រំផ្សព្វផ្សាយច្បាប់ ស្ដីពីចរាចរណ៍ផ្លូវគោកជូនប្រជាពលរដ្ឋបានចំនួន ៥.៩៧៣នាក់ និងបានចែកមួកសុវត្ថិភាពសរុប ៧.០៤៤មួក និងស្ទីកឃ័រចំណាំងផ្លាតប្រមាណ ១៣ម៉ឺនសន្លឹក ជូនប្រជាជនដោយឥតគិតថ្លៃ ដើម្បីចូលរួមកាត់បន្ថយគ្រោះថ្នាក់ចរាចរណ៍ផ្លូវគោក៕