មន្រ្តីជាន់ខ្ពស់ក្រសួងសាធារណការ និងដឹកជញ្ជូនចំនួន ៤ រូប ទទួលបានការចាត់តាំងទទួលខុសត្រូវលើការចុះតាមដានត្រួតពិនិត្យគុណភាពកំណាត់ផ្លូវជាតិចំនួន ៤ ខ្សែ ដែលកំពុងដំណើរការស្ថាបនា ដើម្បីធានាបានទាំងគុណភាពនិងការអនុវត្តស្របតាមបទដ្ឋានបច្ចេកទេសត្រឹមត្រូវ។ លោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន ជានាយកទទួលខុសត្រូវលើការដ្ឋានកំណាត់ផ្លូវជាតិលេខ ៤៨ នៅខេត្តកោះកុង។ ផ្លូវជាតិលេខ ៤៨ កំពុងស្ថាបនាដោយក្រុមហ៊ុនកូរ៉េ ILSUNG & HANIL Joint Venture មានប្រវែង ១៤៨ គីឡូម៉ែត្រចាប់ពីបំបែកផ្លូវជាតិលេខ ៤ ចំណុចបង្គោលគីឡូម៉ែត្រលេខ ១៤១+៧៥០ (ចំការហ្លួង) រហូតដល់ក្រុងខេមរភូមិន្ទ នៃខេត្តកោះកុង។ដំណើរការបើកការដ្ឋានសាងសង់កាលពីថ្ងៃទី០៣ ខែមករា ឆ្នាំ២០២២ ខ្សែផ្លូវប្រវែង ១៤៨ គីឡូម៉ែត្រនេះ ជាប្រភេទផ្លូវបេតុងកៅស៊ូ (AC) ដែលអនុវត្តក្រោមទំហំទឹកប្រាក់ប្រមាណជាង ៧៨ លានដុល្លារ។ គិតត្រឹមថ្ងៃចុងឆ្នាំ២០២៣ សម្រេចការសាងសង់បានប្រមាណ ៤០%។ ដោយឡែកផ្លូវជាតិលេខ ៧ ពីស្គន់ទៅក្រុងកំពង់ចាម ស្ថិតនៅក្រោមការគ្រប់គ្រងរបស់លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន។ គម្រោងផ្លូវជាតិលេខ ៧ ជាគម្រោងពង្រីកនិងលើកកម្រិតគុណភាពផ្លូវ ពី ២ គន្លងទៅ ៤ គន្លង លើប្រវែងផ្លូវជាង ៤៥ គីឡូម៉ែត្រ ចាប់ពីរង្វង់មូលស្គន់ ដល់គល់ស្ពានគីស្សូណា។ការដ្ឋានផ្លូវនេះបានបើការដ្ឋានស្ថាបនាកាលពីថ្ងៃទី៩ ខែមករា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន។ យោងតាមការសិក្សាស្ថានភាពនៃគម្រោងខ្សែផ្លូវនេះមានភាពស្មុគស្មាញខ្លាំង ដែលជះឥទ្ធិពលដល់ផែនការវឌ្ឍនភាពទាំងមូលរបស់គម្រោង។ ដោយឡែក លោក ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន ជាប្រធានគ្រប់គ្រងគម្រោងពង្រីក និងលើកកម្រិតគុណភាពផ្លូវជាតិលេខ ៣៣។គម្រោងពង្រីកនិងលើកកម្រិតគុណភាពផ្លូវជាតិលេខ ៣៣ បានបើកការដ្ឋានសាងសង់កាលពីថ្ងៃទី ៣០ ខែធ្នូ ឆ្នាំ២០២២។ ផ្លូវនេះមានប្រវែងប្រមាណ ៥២,៥៧ គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ ៣ ត្រង់ចំណុចគ.ម១៤៨+១០០) ទៅកាន់ច្រកលក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្ត ស្រុកទឹកឈូ និងស្រុកកំពង់ត្រាច នៃខេត្តកំពត ហើយឆ្លងកាត់ភូមិសាស្រ្ត ក្រុងកែប និងស្រុកដំណាក់ចង្អើរ នៃខេត្តកែប។ គិតត្រឹមថ្ងៃទី២៧ ខែតុលា ឆ្នាំ២០២៣ វឌ្ឍនភាពនៃគម្រោងបានសម្រេចលទ្ធផលការងារជិត ៤០%។ នៅលើកំណាត់ផ្លូវជាតិលេខ ១០ ដែលជាផ្លូវប្រវត្តិសាស្រ្តថ្មីភ្ជាប់ទឹកដីខេត្តបាត់ដំបង ពោធិ៍សាត់ និងកោះកុង ទទួលបន្ទុកតាមដានត្រួតពិនិត្យដោយលោក បុង ប៊ុនហួន រដ្ឋលេខាធិការក្រសួងសាធារណការ និងដឹកជញ្ជូន។ផ្លូវជាតិលេខ ១០ មានប្រវែង ១៩៧,៦៩៧គីឡូម៉ែត្រ លាតសន្ធឹងពីស្រុកសំឡូត នៃខេត្តបាត់ដំបង ឆ្លងកាត់ស្រុកវាលវែង នៃខេត្តពោធិ៍សាត់ បន្តរហូតដល់ខេត្តកោះកុង។ គិតមកទល់បច្ចុប្បន្ន គម្រោងការងារសម្រេចបានជាង ៧០% ហើយអាចបញ្ចប់ទាំងស្រុងនៅអំឡុងឆ្នាំ ២០២៥។ ក្រសួងសាធារណការនិងដឹកជញ្ជូនបានចាត់វិធានការពង្រឹងតាមដានជាប់ជាប្រចាំនៅរាល់ការដ្ឋានស្ថាបនាផ្លូវ ដើម្បីធានាគុណភាពស្របតាមស្តង់ដាបច្ចេកទេស ខណៈកន្លងទៅធ្លាប់មានក្រុមហ៊ុនសាងសង់មួយចំនួនអនុវត្តខុសបច្ចេកទេសត្រូវបានព្រមានដាក់ក្នុងបញ្ជីខ្មៅទៀតផង។ កាលជំនាន់លោក ស៊ុន ចាន់ថុល កាន់ជារដ្ឋមន្រ្តី លោកក៏តែងតែក្រើនរំលឹកឲ្យក្រុមហ៊ុនសាងសង់យកចិត្តទុកដាក់លើការពង្រឹងគុណភាពសាងសង់ និងប្រកាសលែងទទួលផ្លូវធ្វើមុខខូចក្រោយធ្វើក្រោយខូចមុខទៀតហើយ៕