ភ្នំពេញ៖ ក្នុងឱកាសបុណ្យចូលឆ្នាំថ្មី ឆ្នាំសកល២០២៤ គិតពីថ្ងៃទី៣០ខែធ្នូ ដល់ ដល់ថ្ងៃទី១ខែមករា ឆ្នាំ២០២៤ មានរថយន្តប្រមាណ៨៤,០០០ម៉ឺនគ្រឿង បានធ្វើដំណើរ​លើ​ផ្លូវ​ល្បឿនលឿនភ្នំពេញ-ព្រះសីហនុ។ លោក ហ៊ាង សុទ្ធាយុត្តិ អគ្គនាយកបច្ចេកវិទ្យា និងទំនាក់ទំនងសាធារណៈ នៃក្រសួង​សាធារ​ណការ និងដឹកជញ្ជូន និងជាអ្នកនាំពាក្យក្រសួងបានប្រាប់ AMS Economy នាព្រឹកថ្ងៃទី២ ខែមករា ឆ្នាំ២០២៤ ថា នៅថ្ងៃទី១ ខែមករា ឆ្នាំ២០២៤ មានចរាចរណ៍ ៣៣ ,២០០គ្រឿង បើប្រៀបធៀបនឹងថ្ងៃទី១ ខែមករាឆ្នាំ២០២៣ ដែលមាន ២២ ៣០០ ឃើញ​ថាកើនឡើងប្រមាណជិត៥០ ភាគរយ។ នៅថ្ងៃទី៣១ ខែធ្នូ ឆ្នាំ២០២៣ មានរថយន្តប្រមាណ ២៨,០០០គ្រឿង និងថ្ងៃទី៣០ ខែធ្នូ មាន ២១,០០០ គ្រឿង។ទាក់ទងនឹងការកកស្ទះចរាចរណ៍នៅតាមបញ្ជរបង់ប្រាក់នៅខេត្តព្រះសីហនុ និងនៅរាជ​ធានី​ភ្នំពេញផងដែរនោះ លោក ហ៊ាង សុទ្ធាយុត្តិ បានឱ្យដឹងថា៖ការកក​ស្ទះ​នេះ មានកត្តាចំនួនពីរ គឺទី១ ម្ចាស់យានយន្តមិនបានប្រើប្រាស់កាត ETC ដែលជា​មធ្យោ​បាយងាយស្រួលសម្រាប់ឆ្លងកាត់បញ្ជរបង់ប្រាក់ ហើយនៅតែបន្តប្រើជម្រើស​បង់​លុយ​នៅនឹងកន្លែង។ កត្តាមួយទៀត ម្ចាស់យានយន្តមួយចំនួនមិនទាន់យល់​ពីការប្រើ​ប្រាស់​គន្លង ETC និងគន្លងបង់ប្រាក់ធម្មតា។ ម្ចាស់យានយន្តខ្លះមិនមានកាត ETC នោះ​ទេ តែបែរជាបើកចូលគន្លង ETC ទៅវិញ។ លោក ហ៊ាង សុទ្ធាយុត្តិ ក៏បានប្រាប់ពីវីធីប្រើប្រាស់គន្លងឆ្លងកាត់បញ្ជរបង់ប្រាក់ផ្លូវ​ល្បឿនលឿន​ភ្នំពេញ-ព្រះសីហនុ។លោកបានពន្យល់ថា ច្រកចេញចូលផ្លូវល្បឿនលឿន​ភ្នំពេញ-ក្រុងព្រះសីហនុ ត្រូវបានបែងចែកជាបីគន្លង គឺ៖ គន្លង ETC ជាច្រកអាទិភាព មានរបាំងបើកចេញចូលដោយស្វ័យប្រវត្តិនៅខាងឆ្វេងបង្អស់ដែលមានសញ្ញា ETC ។ ដើម្បីប្រើប្រាស់លោកអ្នកត្រូវចុះឈ្មោះប្រើប្រាស់ បំពាក់ឧបករណ៍ OBU នៅមជ្ឈមណ្ឌល ETC ឬទីតាំងកំណត់ដោយក្រសួង និងបញ្ចូលលុយតាមផ្លាកលេខមុននឹងប្រើប្រាស់។ គន្លង ANPR ជាច្រកអាទិភាពក្នុងការចេញចូល ដែលមានលក្ខណៈសាមញ្ញ។ លោក​អ្នក​គ្រាន់តែបញ្ជូលសមតុល្យតាមផ្លាកលេខជាមុន និងចេញចូលគន្លងដែល​មានសញ្ញា ANPR។ ការប្រើប្រាស់គន្លងនេះ មិនតម្រូវឱ្យ​យកកាត និងប្រើប្រាស់សាច់ប្រាក់ឡើយ ដោយលោកអ្នកគ្រាន់តែបញ្ចូលសមតុល្យទៅក្នុងផ្លាកលេខជាការស្រេច។ គន្លង MTC តម្រូវឱ្យយកកាត និងបង់សាច់ប្រាក់នៅច្រកចេញ។ ក្នុងករណីមានចរាចរណ៍មមាញឹក លោកអ្នកអាចប្រឈមនឹងការរងចាំយូរនៅច្រកចេញ។ ពាក់ព័ន្ធវិធីធ្វើដំណើរឆ្លងកាត់ផ្លូវល្បឿនលឿននេះ លោក សុទ្ធាយុត្តិ បានអំពាវនាវម្ចាស់​យាន​យន្តស្វែងយល់ពីការប្រើប្រាស់កាត់ ETC ឬ ANPR ដែលជាមធ្យោបាយបង់​ប្រាក់​ជាមុនតាមប្រព័ន្ធបច្ចេកវិទ្យា ជួយសម្រួលឱ្យការធ្វើដំណើរឆ្លងបញ្ជរបង់ប្រាក់បាន​លឿន​រហ័ស និងមិនស្មុគស្មាញ។ ជាមួយគ្នានេះដែរ ក្រសួងសាធារណការ និងដឹកជញ្ជូនបានលើកចិត្តឱ្យបងប្អូនចូលរួមប្រើប្រាស់គន្លង ETC និង ANPR ឱ្យបានច្រើន ជា​ពិសេស​ការប្រើប្រាស់ទំនើបកម្ម​បច្ចេកវិទ្យាឌីជីថល ដោយបញ្ចូលទឹកប្រាក់​ជាមុនទៅក្នុង​ផ្លាកលេខយានយន្ត ដើម្បីកាត់បន្ថយការចំណាយពេលទូទាត់សាច់ប្រាក់នៅនឹងបញ្ជរ ដែលជាហេតុនាំឲ្យមានការ​កកស្ទះ និងការរីករាលដាលនៃជំងឺ​កូវីត-១៩ផងដែរ។ ប្រសិនបើជ្រើសយកការប្រើប្រាស់គន្លង ETC ឬ ANPR សូមបងប្អូន​បញ្ចូលសមតុល្យទៅក្នុងផ្លាកលេខសម្គាល់យានយន្តជាមុន តាមរយៈកម្មវិធីធនាគារក្នុងទូរស័ព្ទដៃនៃគ្រឹះស្ថានហិរញ្ញវត្ថុនិងធនាគារដៃគូរបស់ក្រសួងសាធារណការនិងដឹកជញ្ជូនដែលវាពិតជាជួយសន្សំពេលវេលានិងផ្តល់ភាពងាយស្រួល។សូមចូលទៅកាន់គេហទំព័រ​ https://ew.mpwt.​gov​.​​kh​ សម្រាប់ឈ្មោះគ្រឹះស្ថានហិរញ្ញវត្ថុ និងធនាគារដៃគូ​៕