ពោធិ៍សាត់៖ មន្ទីរសាធារណការ និងដឹកជញ្ជូន ខេត្តពោធិ៍សាត់ បានបន្តការជួសជុលជុល ថែទាំជាប្រចាំលើ ផ្លូវជាតិលេខ៥៥ (ពោធិ៍សាត់-វាលវែង-ថ្មដា) ជាពិសេសត្រង់កំណាត់លើភ្នំ១៥០០ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ។ កំណាត់ផ្លូវជាតិលេខ៥៥ ត្រូវបានបញ្ចប់ការស្ថាបនានៅឆ្នាំ២០១៨ ដោយក្រុមហ៊ុនសាជីវកម្មស្ពាននិងថ្នល់ចិន (CRBC) និងត្រួតពិនិត្យលក្ខណៈបច្ចេកទេសសាងសង់ ដោយក្រុមហ៊ុនទីប្រឹក្សាបច្ចេកទេស ក្វាងចូវវ៉ានអាន (Guangzhou Wanan Construction Supervision Co.Ltd)។ បន្ទាប់មក ប្រគល់ជូនមន្ទីរសាធារណការ និងដឹកជញ្ជូន ខេត្តពោធិ៍សាត់ ទទួលមកថែទាំប្រចាំបន្ត ចាប់ពីខែមិថុនា ឆ្នាំ២០១៩ និងកំណាត់លើភ្នំ១៥០០ (កំណាត់ដែលមានភ្លៀងធ្លាក់ច្រើន)។ គួរឱ្យដឹងដែរថា ផ្លូវជាតិមួយខ្សែនេះ មានប្រវែង ១៨២,១៦គ.ម ត្រូវបានសម្ពោធជាផ្លូវការនៅថ្ងៃទី០៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រី នីតិកាលទី៦ នៃរដ្ឋសភា៕