អបអរសាទរ! ខួបលើកទី៦៨ នៃការចូលជាសមាជិកអង្គការសហប្រជាជាតិរបស់កម្ពុជា ១៤ ធ្នូ ១៩៥៥ ~ ១៤ ធ្នូ ២០២៣ ក្រសួងសាធារណការ និងដឹកជញ្ជូន សូមចូលរួមអបអរសាទរ ក្នុងឱកាសនៃការប្រារព្ធខួបលើកទី៦៨ នៃការចូលជាសមាជិកអង្គការសហប្រជាជាតិរបស់កម្ពុជា ថ្ងៃទី១៤ ខែធ្នូ ឆ្នាំ២០២៣។ យើងខ្ញុំសូមយកឱកាសនេះ រម្លឹកអំពីព្រឹត្តិការសំខាន់ៗរបស់កម្ពុជា ក្នុងទសវត្សរ៍ឆ្នាំ១៩៥០ ដែលទាក់ទង នឹងការចូលរួមជាមួយអង្គការសហប្រជាជាតិ មកជម្រាបជូនបងប្អូនឱ្យបានជ្រាប។ ប្រទេសកម្ពុជាបានក្លាយជារដ្ឋសមាជិកអង្គការសហប្រជាជាតិ នៅថ្ងៃទី១៤ ខែធ្នូ ឆ្នាំ១៩៥៥ គឺ១០ឆ្នាំក្រោយពីការបង្កើតអង្គការសហប្រជាជាតិ។ មុននោះ នៅឆ្នាំ១៩៥១ កម្ពុជាបានក្លាយជាសមាជិកនៃអង្គការយូណេស្កូ ហើយភ្លាមៗនោះក៏បានបង្កើតគណៈកម្មការជាតិរបស់ខ្លួនផងដែរ។ នៅក្នុងឆ្នាំ១៩៥២ ជំនួយរបស់អង្គការសហប្រជាជាតិចំពោះកម្ពុជា បានចាប់ផ្តើមជាមួយអង្គការយូនីសេហ្វ (UNICEF) បន្ទាប់មកមានអង្គការសុខភាពពិភពលោក (WHO) និងស្ថាប័នមុនដំបូងរបស់ UNDP ដែលជាកម្មវិធីពង្រីកសម្រាប់ជំនួយបច្ចេកទេស ហើយក្រោយមកបានក្លាយជាអង្គការ UNDP ក្នុងឆ្នាំ១៩៦៥៕