កំពត៖ ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដឹកនាំដោយ លោក ជ្រុន ថេរ៉ាវ៉ាត រដ្ឋលេខាធិការ សមាជិកគណៈកម្មាធិការលទ្ធកម្ម (គល) បានចុះត្រួតពិនិត្យ និងវាយតម្លៃលទ្ធផលការងារថែទាំជាប្រចាំផ្លូវក្រាលក្រួសក្រហមចំនួន ១៦ខ្សែ ដែលមានប្រវែងសរុប ១០៤,៤០០ម៉ែត្រ នៅខេត្តកំពត និងបានឯកភាពទទួលយកលទ្ធផលការងារថែទាំផ្លូវរបស់មន្ទីរ១០០%។ ក្រសួងអភិវឌ្ឍន៍ជនបទ ដែលដឹកនាំដោយ លោក ឆាយ ឬទ្ធិសែន បានបង្កើនការយកចិត្តទុកដាក់យ៉ាងខ្លាំងលើគុណភាពនៃការកសាងហេដ្ឋារចនាសម្ព័ន្ធជនបទឱ្យកាន់តែប្រសើរឡើងថែមទៀត ហើយសោភ័ណភាពតាមដងផ្លូវ និងសុវត្ថិភាពក្នុងការធ្វើដំណើរ ក៏ត្រូវបានយកចិត្តទុកដាក់ផងដែរ។ ជាក់ស្តែងនៅថ្ងៃទី១២ ខែធ្នូ ឆ្នាំ២០២៣ ប្រតិភូអន្តរក្រសួង បានចុះត្រួតពិនិត្យ និងវាយតម្លៃលើការងារថែទាំជាប្រចាំផ្លូវក្រាលក្រួសក្រហម ចំនួន ១៦ខ្សែ ដែលមានប្រវែងសរុប ១០៤,៤០០ម៉ែត្រ ដែលទទឹងខ្នងលើ ៤ម៉ែត្រ ៤,៥ម៉ែត្រ ៥ម៉ែត្រ ៦ម៉ែត្រ និង ៧ម៉ែត្រ ស្ថិតក្នុងឃុំជម្ពូវ័ន្ត ឃុំតាកែន ឃុំបឹងនិមល ឃុំឈូក ឃុំមានរិទ្ធ ឃុំដងទង់ ឃុំខ្ចាយខាងជើង ឃុំខ្ចាយខាងត្បូង ឃុំទទុង ឃុំល្អាង ឃុំកណ្តោល ឃុំត្រពាំងព្រីង ឃុំកូនសត្វ ឃុំព្រៃថ្នង ឃុំបន្ទាយមាសខាងកើត ឃុំត្នោតចុងស្រង់ ស្រុកជុំគិរី ស្រុកឈូក ស្រុកដងទង់ ស្រុកទឹកឈូ និងស្រុកបន្ទាយមាសខេត្តកំពត ដែលទទួលអនុវត្តដោយមន្ទីរអភិវឌ្ឍន៍ជនបទខេត្តកំពត និងប្រើប្រាស់ថវិកាជាតិជំពូក៦១។ លោក ហ៊ សូរិន ប្រធានមន្ទីរអភិវឌ្ឍន៍ជនបទ បានឱ្យដឹងថា ផ្លូវក្រាលក្រួសក្រហមចំនួន ១៦ខ្សែ មន្ទីរអភិវឌ្ឍន៍ជនបទ តែងតែយកចិត្តទុកដាក់ និងបានខិតខំបំពេញការងារថែទាំផ្លូវជាប្រចាំ ដោយសម្រេចលទ្ធផលការងារថែមក្រួសក្រហម (102-MLR) សម្រេចបាន ១០០%, ការងារកៀរផ្លូវក្រហម (103-MLR) សម្រេចបាន ១០០%, ការងារបំពេញដីតាមជើងទេរ (105-MLR)សម្រេចបាន ១០០%។ បន្ទាប់ពីបានចុះត្រួតពិនិត្យជាក់ស្តែងអំពីការងារថែទាំប្រចាំផ្លូវក្រាលក្រួសក្រហមចំនួន ១៦ខ្សែ នេះ លោក ជ្រុន ថេរ៉ាវ៉ាត បានសរសើរដល់ក្រុមការងារមន្ទីរអភិវឌ្ឍន៍ជនបទ ក្នុងបំពេញកិច្ចការងារបានល្អ ហើយគណៈកម្មការបានឯកភាពទទួលយក១០០% ចំពោះលទ្ធផលថែទាំផ្លូវក្រាលក្រួសក្រហមទាំង ១៦ខ្សែនោះ។ ទន្ទឹមនេះក៏បានសំណូមពរដល់អាជ្ញាធរមូលដ្ឋានភូមិ-ឃុំ ចូលរួមថែរក្សាផ្លូវទាំងនោះឱ្យបានល្អ និងចូលរួមទប់ស្កាត់ការដឹកជញ្ជូនលើសទម្ងន់កំណត់ ដើម្បីរក្សាគុណភាពផ្លូវឱ្យជាប់បានយូរ ងាយស្រួលក្នុងការធ្វើដំណើរ ពិសេសពលរដ្ឋត្រូវចាត់ទុកផ្លូវទាំងអស់នៅក្នុងមូលដ្ឋានជាផ្លូវរបស់ខ្លួន៕