កិច្ចប្រជុំពិនិត្យ និងពិភាក្សាលើខ្លឹមសារកំណត់ហេតុសង្ខេបជំនួយបច្ចេកទេសរបស់ដៃគូអភិវឌ្ឍន៍ នៃប្រទេសអូស្ត្រាលី ដើម្បីគ្រប់គ្រងវិស័យទឹកកខ្វក់ឱ្យកាន់តែល្អប្រសើរ ទីស្តីការក្រសួង៖ នាព្រឹកថ្ងៃទី១៥ ខែវិច្ឆិកា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យ និងពិភាក្សាលើខ្លឹមសារកំណត់ហេតុសង្ខេបជំនួយបច្ចេកទេសរបស់ដៃគូអភិវឌ្ឍន៍ នៃប្រទេសអូស្ត្រាលី ក្នុងភាពជាដៃគូសម្រាប់ហេដ្ឋារចនាសម្ព័ន្ធ (Partnerships for Infrastructure -P4I) ផ្តោតលើគោលនយោបាយ និងយុទ្ធសាស្រ្តគ្រប់គ្រងវិស័យទឹកកខ្វក់ ដោយមានការចូលរួមពី ឯកឧត្តមអនុរដ្ឋលេខាធិការ អគ្គនាយកស្ដីទី អគ្គនាយករង ប្រធាន-អនុប្រធាននាយកដ្ឋាន និងមន្ត្រីជំនាញ នៃអគ្គនាយកដ្ឋានប្រព័ន្ធចម្រោះទឹកកខ្វក់។ គោលបំណងសំខាន់នៃកិច្ចប្រជុំ គឺដើម្បីធ្វើការពិនិត្យបន្ថែមលើខ្លឹមសារកំណត់ហេតុសង្ខេបជំនួយបច្ចេកទេសរបស់ដៃគូអភិវឌ្ឍន៍ នៃប្រទេសអូស្ត្រាលី និងផ្ទៀងផ្ទាត់លើសំណើជាមួយដៃគូអភិវឌ្ឍន៍នានាមួយចំនួនផងដែរ ដូចជា វិទ្យាស្ថាន AgroParisTech នៃប្រទេសបារាំង ទីប្រឹក្សាបច្ចេកទេស ហ្រ្គែត (GRET) ដែលសហការ និងផ្តល់ជាជំនួយបច្ចេកទេសលើការងារដែលមានចរិតលក្ខណៈ និងទំហំការងារដូចគ្នា ក្នុងគោលបំណងជៀសវាងភាពត្រួតស៊ីគ្នា៕